গোলাগাট, 24 জুন: গোলাঘাট আৰু দেৰগাঁও আৰক্ষীৰ বৃহৎ সফলতা৷ একেদিনাই ৫ খন চুৰি মটৰ চাইকেল উদ্ধাৰ কৰাৰ লগতে এটা ভুৱা ডি টি অ কাৰ্যালয় উৎখাত আৰু মুঠ তিনিটা গভাইট চোৰক গ্ৰেপ্তাৰ কৰে গোলাঘাট আৰু দেৰগাঁও আৰক্ষীয়ে৷ এখন বুলেট দুখন পালচাৰ বাইক এখন স্কুটি আৰু এখন স্পেলেণ্ডাৰ জব্দ কৰিবলৈ সক্ষম হয়৷ ইমানেই নহয়, ভুৱা ডি টি অ কাৰ্যালয় চলাই থকা কম্পিউটাৰ চেট আৰু ভুৱা স্মাৰ্ট কাৰ্ড জব্দ কৰিবলৈ সক্ষম হয় । ইয়াৰ উপৰিও মটৰ চাইকেল চুৰিৰ এটা বৃহৎ দলকো গ্ৰেপ্তাৰ কৰিবলৈ সক্ষম হয় গোলাঘাটৰ আৰক্ষী৷
বিগত কিছুদিন ধৰি গোলাঘাট জিলাৰ বিভিন্ন অঞ্চলত এটা বৃহৎ বাইক চুৰি চক্ৰ সক্ৰিয় হৈ পৰিছিল । সঘনাই চুৰি হৈছিল বাইক । আৰক্ষী বিভাগৰ মুৰৰ কামুৰণি হৈ পৰা এই বৃহৎ গেংটো ধৰিবলৈ চেষ্টা চলাই আছিল আৰক্ষীয়ে । দেওবাৰে গোলাঘাট আৰক্ষীয়ে দেৰগাঁও আৰক্ষীৰ সহযোগত অভিযান চলাই এখন চুৰি বুলেট উদ্ধাৰ কৰাৰ লগতে বীৰকুছি দলে নামৰ গভাইট চোৰ এটাক গ্ৰেপ্তাৰ কৰে । এই বীৰকুছি দলেৰ জিম্মাৰ পৰা উদ্ধাৰ কৰে কিছু সংখ্যক স্মাৰ্ট কাৰ্ড , অধিক সোধা পোচাৰ অন্ততঃ অন্য দুখন পালচাৰ বাইক আৰু এখন স্কুটি উদ্ধাৰ কৰিবলৈ সক্ষম হয় গোলাঘাট আৰক্ষী৷
বীৰকুছি দলেৰ জিম্মাৰ পৰা উদ্ধাৰ কৰা স্মাৰ্ট কাৰ্ড সমূহ কত তৈয়াৰ হয় সেই সম্পৰ্কত সোধ-পোচ কৰাত যোৰহাটৰ চুপাৰ মাৰ্কেটত প্ৰস্তুত কৰা বুলি স্বীকাৰোক্তি প্ৰদান কৰে চোৰটোৱে৷ সেই অনুসৰি যোৰহাটৰ টীয়কৰ পৰা অৰূপ বৰুৱা নামৰ কম্পিউটাৰ দোকান থকা ব্যক্তি জনক আৰক্ষীয়ে গ্ৰেপ্তাৰ কৰে । অৰূপ বৰুৱাৰ দোকানত অভিযান চলাই বহু সংখ্যক প্ৰস্তুত কৰি থোৱা স্মাৰ্ট কাৰ্ড উদ্ধাৰ কৰিবলৈ সক্ষম হয় । লগতে ৰাজ্য খনৰ বিভিন্ন জিলাৰ ডি টি অৰ স্বাক্ষৰযুক্ত স্মাৰ্ট কাৰ্ডও উদ্ধাৰ কৰে আৰক্ষীয়ে৷
অৰ্থাৎ আৰক্ষীয়ে অৰূপ বৰুৱাই দীৰ্ঘদিনৰ পৰা এটা ভুৱা ডি টি অ কাৰ্যালয় চলাই থকা বুলি তথ্য লাভ কৰিবলৈ সক্ষম হয় । বীৰকুছি দলে আৰু অৰূপ বৰুৱাৰ স্বীকাৰোক্তিৰ ভিত্তিত অন্য দুটা গভাইট চোৰ বিজয় পেগু আৰু অজয় পেগুক গ্ৰেপ্তাৰ কৰে । এই তিনিওটা গভাইট চোৰৰ ঘৰ দেৰগাঁও আৰক্ষী থানাৰ অন্তৰ্গত । এওঁলোকৰ জিম্মাৰ পৰা গোলাঘাট আৰক্ষীয়ে মুঠ চাৰিখন মটৰ চাইকেল উদ্ধাৰ কৰে । এওঁলোকৰ স্বীকাৰোক্তিৰ ভিত্তিত উদ্ধাৰ কৰা অন্য এখন স্পেলেণ্ডাৰ মটৰ চাইকেল মৰিয়ণী আৰক্ষী থানাত ৰখা হৈছে বুলি গোলাঘাট আৰক্ষীয়ে জানিবলৈ দিয়ে ।
