চিৰাং, 16 এপ্ৰিলঃ বঙাইগাঁও অগপ কাৰ্যালয়ত দলটোৰ মিত্ৰজোঁটৰ বৰপেটা লোকসভা সমষ্টিৰ প্ৰাৰ্থী কুমাৰ দীপক দাসৰ সংবাদমেল। সংবাদমেলত কংগ্ৰেছ আৰু এ আই ইউ ডি এফ দলক এটা মুদ্ৰাৰ ইপিঠি সিপিঠি বুলি উল্লেখ কৰি প্ৰাৰ্থী গৰাকীয়ে কয় যে, "দুয়োটা দলেই কিছুদিন পূৰ্বে গোপন মিত্ৰতা কৰিছিল যদিও এতিয়া দুয়ো দুয়োৰে অস্তিত্ব ৰক্ষাৰ সংগ্ৰাম কৰি থকা পৰিলক্ষিত হৈছে । দুয়োটা দলেই নিজ নিজ ক্ষমতা অনুসৰি সংখ্যালঘু অঞ্চল সমূহত প্ৰভাৱ বিস্তাৰৰ চেষ্টা অব্যাহত ৰাখিছে । "
লগতে কংগ্ৰেছে অগপ-বিজেপি-বিপিএফৰ মিত্ৰজোঁটৰ প্ৰাৰ্থীৰ কোনো ক্ষতি কৰিব নোৱাৰিব বুলিও উল্লেখ কৰে প্ৰাৰ্থীগৰাকীয়ে। তাৰোপৰি অসমীয়া বঙালীৰ ভোট পোৱাৰ লগতে সংখ্যালঘু সকলৰো বৃহৎ পৰিমাণৰ ভোট লাভেৰে মিত্ৰজোঁটৰ চৰকাৰে জয়লাভ কৰিব বুলিও সংবাদমেলত উল্লেখ কৰে কুমাৰ দীপক দাসে৷ উল্লেখ্য যে সোমবাৰে দিনৰ ভাগত বঙাইগাঁও বিধানসভা সমষ্টিত নিৰ্বাচনী প্ৰচাৰ চলোৱাৰ পিচত নিশা দহ বজাৰ পিচত বিজেপিৰ জিলা সভাপতি সুখেন্দু ৰায়সহ অগপৰ বঙাইগাঁও জিলা কাৰ্যালয়ত উপস্থিত হৈ সংবাদমেল সম্বোধন কৰে বৰপেটা লোকসভা সমষ্টিৰ প্ৰাৰ্থী কুমাৰ দীপক দাসে ৷
