বৰপেটা, ২১ এপ্ৰিল : দেওবাৰে অন্ত পৰে তৃতীয় পৰ্যায়ৰ নিৰ্বাচনৰ প্ৰচাৰ অভিযান । নিৰ্বাচনী প্ৰচাৰৰ অন্তিমটো দিনত বৰপেটাত অগপই উলিয়াই এক বিশাল বাইক ৰেলী । এই বিশাল বাইক ৰেলীত নিৰ্বাচনী প্ৰচাৰ চলায় বৰপেটাৰ বিজেপি-বিপিএফ মিত্ৰজোঁটৰ সমৰ্থিত অগপ প্ৰাৰ্থী কুমাৰ দীপক দাসে । বৰপেটাৰ অগপ বিধায়ক গুনীন্দ্ৰ নাথ দাসৰ সৈতে নিৰ্বাচনী প্ৰচাৰ চলায় অগপ প্ৰাৰ্থীগৰাকীয়ে । ৰেলীত বৰপেটা সমষ্টিত অগপ-মিত্ৰজোঁটে জয় লাভ কৰিব বুলি দাবী কৰে অগপ প্ৰাৰ্থী কুমাৰ দীপক দাসে ।
আনহাতে, সকলো জাতি-জনগোষ্ঠীয়ে সমৰ্থন জনোৱাৰ বাবে তেওঁক অধিক আত্মবিশ্বাসী কৰি তুলিছে বুলিও দাবী কৰে দাসে ৷ বৰপেটাৰ সাতামপুৰুষীয়া ঐতিহ্য, সম্প্ৰীতি ৰক্ষা কৰি ইয়াত থকা হিন্দু-মুছলমান, জনজাতি-অজনজাতি, অসমীয়া-বাঙালীৰ লগতে বিভিন্ন জাতি জনগোষ্ঠীৰ মাজত সমন্বয় আৰু সংহতি সুদৃঢ় কৰি এই অঞ্চলৰ দীৰ্ঘদিনীয়া সমস্যা সমাধানত দৃঢ় প্ৰতিজ্ঞা বুলি মন্তব্য কৰে অগপ প্ৰাৰ্থীগৰাকীয়ে ৷ এই নিৰ্বাচনত বৰপেটাৰ অগপ প্ৰাৰ্থীগৰাকীৰ বাবে কংগ্ৰেছ অথবা এ.আই.ইউ.ডি.এফ কোনো ফেক্টৰ নহয় বুলিও মত পোষণ কৰে কুমাৰ দীপকে ।
