নেশ্যনেল ডেস্ক, 11 ডিচেম্বৰ : কৰ্ণাটকৰ বেলাগাভি জিলাত জঘন্য ঘটনা সংঘটিত হৈছে ৷ দেওবাৰে নিশা বেলাগাভি তালুকৰ এখন গাঁৱত এগৰাকী মহিলাক বিবস্ত্ৰা কৰি পেৰেড কৰোৱাৰ লগতে বিদ্যুতৰ খুটাত বান্ধি, মাৰপিট কৰাৰ ভয়ংকৰ ঘটনা পোহৰলৈ আহিছে ৷ ইতিমধ্যে এই ঘটনাৰ লগত জড়িত 7 জন লোকক গ্ৰেপ্তাৰ কৰা হৈছে ৷
ঘটনাৰ বিৱৰণী অনুসৰি, ভুক্তভোগী মহিলাগৰাকীৰ পুত্ৰ এগৰাকী যুৱতীৰ প্ৰেমত পৰিছিল ৷ কিন্তু তেওঁলোকৰ সম্পৰ্ক যুৱতীগৰাকীৰ ঘৰত মানি লোৱা নাছিল ৷ যুৱতীগৰাকীৰ পৰিয়ালে ইতিমধ্যে যুৱতীগৰাকীৰ বিবাহ অন্য যুৱকৰ সৈতে ঠিক কৰিছিল ৷ দেওবাৰে যুৱতীগৰাকীৰ বাগদানৰ অনুষ্ঠান আয়োজন কৰিছিল যুৱতীগৰাকীৰ পৰিয়ালে ৷ আনকি যুৱতীগৰাকীৰ বিবাহৰ তাৰিখো ঠিক কৰিছিল পৰিয়ালৰ সদস্যসকলে ৷ কিন্তু যুৱতীগৰাকীয়ে বাগদানৰ তাৰিখৰ এদিনৰ পূৰ্বে মহিলাগৰাকীৰ পুত্ৰ অৰ্থাৎ প্ৰেমিকজনৰ লগত পলাই যাবলৈ ঠিৰাং কৰিলে ৷
দুয়োৰে সিদ্ধান্তমৰ্মে ভুক্তভোগী মহিলাগৰাকীৰ পুত্ৰই যুৱতীগৰাকীক পলুৱাই লৈ গৈছিল ৷ এই ঘটনাৰ খবৰ পাই যুৱতীগৰাকীৰ ঘৰৰ পৰিয়ালৰ লোক ক্ষুব্ধ হৈ পৰে ৷ তাৰ পিচতে যুৱতীগৰাকীৰ পৰিয়ালৰ সদস্যসকলে যুৱকজনৰ ঘৰলৈ আহি ঘৰ দুৱাৰ লণ্ডভণ্ড কৰাৰ লগতে মাতৃক আক্ৰমণ কৰে। যুৱতীৰ পৰিয়ালে ইমানতেই ক্ষান্ত নাথাকি মহিলাগৰাকীক এটা বিদ্যুতৰ খুঁটাত বান্ধি থোৱাৰ উপৰি বিবস্ত্ৰা কৰি গাঁওখনত পেৰেড কৰায় ৷ ইয়াৰোপৰি মহিলাগৰাকীক মাৰপিট কৰে ৷
এই ঘটনাৰ খবৰ লাভ কৰি কাকতি ষ্টেচন আৰক্ষীয়ে নিশা পলমকৈ ঘটনাস্থলীত উপস্থিত হৈ সমগ্ৰ ঘটনাৰ বুজ লয় । ইতিমধ্যে এই ঘটনা সন্দৰ্ভত আৰক্ষীয়ে 7 অভিযুক্তক গ্ৰেপ্তাৰ কৰিছে। মহানগৰ আৰক্ষী আয়ুক্ত এছ এন চিদ্দাৰামাপ্পাইও সোমবাৰে গাঁওখন পৰিদৰ্শন কৰি ঘটনা সন্দৰ্ভত সোধা পোছা কৰে ।
সম্প্ৰতি আৰক্ষীয়ে পলাতক যুৱক আৰু যুৱতীগৰাকীক বিচাৰিবলৈ অভিযান অব্যাহত ৰাখিছে ৷ এই ঘটনাৰ পিচতে গাঁওখনত 2 টা কে এছ আৰ পি দল আৰু এটা আৰক্ষী দলো মোতায়েন কৰা হৈছে ।
