নিউজ ডেস্ক, 30 ডিচেম্বৰ : একাধিক বিশ্ব চেম্পিয়নশ্বিপ পদক বিজয়ী আৰু তাৰকা গ্ৰেপলাৰ বিনেশ ফোগাটে শনিবাৰে তেওঁৰ খেল ৰত্ন আৰু অৰ্জুন বঁটা ঘূৰাই দিয়ে ৷ কৰ্তব্য পথত দুয়োটা বঁটা ত্যাগ কৰে তাৰকা খেলুৱৈগৰাকীয়ে ৷
এছিয়ান গেমছৰ স্বৰ্ণ পদক বিজয়ী গ্ৰেপলাৰগৰাকীয়ে তেওঁৰ খেল ৰত্ন আৰু অৰ্জুন বঁটা চৰকাৰলৈ ঘূৰাই দিয়াৰ সিদ্ধান্ত লৈছিল আৰু কৈছিল যে এনে সন্মান এনে সময়ত অৰ্থহীন হৈ পৰিছে যেতিয়া মল্লযোদ্ধাসকলে ন্যায় পাবলৈ সংগ্ৰাম কৰি আছে ৷ তেওঁ প্ৰধানমন্ত্ৰী নৰেন্দ্ৰ মোদীলৈ এখন পত্ৰ লিখিছিল ৷ বিনেশ ফোগাটক দিল্লী আৰক্ষীয়ে প্ৰধানমন্ত্ৰীৰ কাৰ্যালয়ত উপস্থিত হোৱাত বাধা প্ৰদান কৰে আৰু ইয়াৰ পিছত তেওঁ কৰ্তব্য পথত তেওঁৰ বঁটাসমূহ ত্যাগ কৰে ৷
শনিবাৰে তেওঁ তেওঁৰ পুৰস্কাৰ ঘূৰাই দিবলৈ প্ৰধানমন্ত্ৰীৰ কাৰ্যালয়ত উপস্থিত হ'বলৈ চেষ্টা কৰিছিল কিন্তু আৰক্ষীয়ে তেওঁক পিএমঅ'ত উপস্থিত হোৱাত বাধা দিছিল ৷ প্ৰতিবাদ স্বৰূপে তেওঁ কৰ্তব্য পথত বঁটাবোৰ ত্যাগ কৰিছিল আৰু পিছত এই বঁটা দিল্লী আৰক্ষীয়ে তুলি লয় ৷
ফোগাটে অলিম্পিক পদক বিজয়ী সাক্ষী মালিক আৰু বজৰং পুনিয়াৰ সৈতে ভাৰতীয় কুস্তি ফেডাৰেচন (ডব্লিউএফআই)ৰ প্ৰাক্তন সভাপতি ব্ৰজ ভূষণ শৰণ সিঙৰ ঘনিষ্ঠ সহযোগী সঞ্জয় সিঙৰ নিৰ্বাচনৰ বিৰুদ্ধে প্ৰতিবাদ কৰিছিল, যাৰ বিৰুদ্ধে তিনিজন প্ৰখ্যাত গ্ৰেপলাৰে যৌন নিৰ্যাতনৰ অভিযোগ উত্থাপন কৰিছিল ৷
সঞ্জয় সিঙৰ ডব্লিউএফআই প্ৰধান হিচাপে নিযুক্তিৰ পিছতে সাক্ষীয়ে কুস্তিৰ পৰা অৱসৰ ঘোষণা কৰিছিল ৷ অৱশ্যে পৰৱৰ্তী সময়ত ক্ৰীড়া মন্ত্ৰালয়ে সিদ্ধান্ত গ্ৰহণৰ সময়ত নিজৰ সংবিধানৰ বিধানসমূহ পালন নকৰাৰ বাবে নৱনিৰ্বাচিত পেনেলটোক নিলম্বন কৰাৰ লগতে ইণ্ডিয়ান অলিম্পিক এছ’চিয়েশ্যনক ক্ৰীড়া সংস্থাটোৰ কাম-কাজ পৰিচালনাৰ বাবে এড-হক পেনেল গঠন কৰিবলৈ কয় ৷
পূৰ্বতে টুইটাৰ নামেৰে জনাজাত এক্সত পোষ্ট কৰা তেওঁৰ পত্ৰখনত ফোগাটে কৈছিল যে তেওঁলোকৰ জীৱন সেই "আকৰ্ষণীয় চৰকাৰী বিজ্ঞাপন"ৰ দৰে নহয় যিয়ে মহিলাৰ সৱলীকৰণ আৰু উন্নতিৰ কথা কয় ৷ ক্ৰীড়া মন্ত্ৰালয়ৰ নিৰ্দেশনা অনুসৰি, ভাৰতীয় অলিম্পিক সংস্থাই বুধবাৰে ডব্লিউএফআইৰ দৈনন্দিন কাম-কাজ চলাবলৈ অলিম্পিয়ান এম এম সোমায়াক লৈ তিনিজনীয়া এড হক কমিটি গঠন কৰে ৷
লগতে পঢ়ক : ক্ৰীড়া মন্ত্ৰালয়ক অলিম্পিকৰ প্ৰস্তুতি আৰম্ভ কৰাৰ আহ্বান বজৰং পুনিয়াৰ
