নিউজ ডেস্ক, ১২ ফেব্ৰুৱাৰী: উত্তৰাখণ্ডত ভয়ংকৰ হিমবাহ বিস্ফোৰণত আৱদ্ধ লোকসকলৰ সন্ধানত অভিযান অব্যাহত । শুকুৰবাৰে চামোলি জিলাৰ তপোৱনৰ সুৰংগত ষষ্ঠ দিনাও অব্যাহত আছে উদ্ধাৰ অভিযান । ৰাজ্য চৰকাৰৰ তৰফৰ পৰা সদৰী কৰে এই কথা । তপোৱনত সুৰংগত প্ৰায় ৩০ জন লোক আৱদ্ধ হোৱাৰ আশংকা কৰিছে উদ্ধাৰ অভিযানকাৰী দলে । বৃহস্পতিবাৰে ঋষিগঙ্গা নদীত জলস্তৰ বৃদ্ধি পোৱাত সাময়িকভাৱে উদ্ধাৰ অভিযান স্থগিত ৰখা হৈছিল ।
ৰাজ্য় চৰকাৰে প্ৰকাশ কৰা মতে, হিমবাহ বিস্ফোৰণৰ ফলত জিলাখনৰ বিভিন্ন অঞ্চলৰ পৰা এতিয়ালৈ ৩৬ টা মৃতদেহ উদ্ধাৰ কৰা হৈছে । আনহাতে তপোবনৰ সুৰঙ্গৰ ভিতৰত থকা ৩০ জন লোক আবদ্ধ হৈ থকাৰ লগতে ২০৪ জন লোক এতিয়ালৈ সন্ধানহীন হোৱাৰ খবৰ আহিছে । সুৰঙ্গৰ ভিতৰত আবদ্ধ লোকক উদ্ধাৰৰ বাবে বিভিন্ন ব্য়ৱস্থা গ্ৰহণ কৰিছে প্ৰশাসনে । ইফালে ঋষিগঙ্গা নদীত জলস্তৰ বৃদ্ধি পোৱাত অঞ্চলবাসীক সতৰ্কতা বাণী জাৰি কৰাৰ লগতে অধিক আতংকিত নহ'বলৈ অনুৰোধ জনায় আৰক্ষীয়ে ।
উল্লেখ্য যে, দেওবাৰে উত্তৰাখণ্ডৰ চামোলি জিলাৰ তপোৱন-ৰেনি অঞ্চলত সংঘটিত হিমবাহ বিস্ফোৰণৰ ফলত ধলিগঙ্গা আৰু অলকনন্দা নদীত সৃষ্টি হৈছিল বানপানীৰ। যাৰফলত বহু বাসগৃহ আৰু ওচৰৰ ঋষিগঙ্গা বিদ্যুৎ প্ৰকল্প ক্ষতিগ্ৰস্ত হয় । চামোলি জিলাত সংঘটিত এই বিস্ফোৰণত ইতিমধ্য়ে মৃত্য়ু হৈছে কেইবাজনো লোকৰ ।
