নেশ্যনেল ডেস্ক,১১ জুলাই : পুৱাৰে পৰা পশ্চিমবংগৰ প্ৰায় ৩৩৯ টা কেন্দ্ৰত পঞ্চায়ত নিৰ্বাচনৰ ভোটগণনা অব্যাহত আছে । বহু পঞ্চায়তত শাসকীয় তৃণমূল কংগ্ৰেছে অগ্ৰগতি লাভ কৰিছে । তেনে সময়তে আকৌ ৰাজ্যখনৰ বিভিন্ন স্থানত তৃণমূল কংগ্ৰেছ আৰু বিৰোধীৰ মাজত সংঘৰ্ষ হোৱাও দেখা গৈছে । খবৰ অনুসৰি ডিচিআৰচিত ভোট গণনাক লৈ তীব্ৰ উত্তেজনাৰ সৃষ্টি হৈছে । গণনা কেন্দ্ৰত একাংশ লোকে বেলট পেপাৰ ফালি পেলোৱাৰ অভিযোগ উঠিছে ।
ইফালে আৰক্ষীয়ে তৃণমূলৰ প্ৰাৰ্থী ৰিংকু ৰায়ক গ্ৰেপ্তাৰ কৰিছে । বাংকুৰা জিলাৰ ৩ টা গাঁও পঞ্চায়ত ক্ৰমে ছটনা, চিমলাপাল আৰু ৰায়পুৰত জয়লাভ কৰা টিএমচিৰ বিৰুদ্ধে নদিয়াৰ শান্তিপুৰ খণ্ডৰ ফুলিয়া বালিকা বিদ্যামন্দিৰৰ ষ্ট্ৰংৰুমত আক্ৰমণ কৰাৰ অভিযোগ উত্থাপিত হৈছে ।
ইফালে শংকৰীল খণ্ডৰ যোৰহাট পঞ্চায়তত বাওঁপন্থী দলবোৰে ভাল প্ৰদৰ্শন কৰা দেখা গৈছে । চিপিআই(এম)ৰ প্ৰাৰ্থীয়ে ৬৫, ৬৭, ৬৯ নম্বৰৰ বুথত আৰু চিপিআই প্ৰাৰ্থীয়ে ৫৮ নম্বৰৰ বুথত জয়ী হৈছে । তৃণমূলৰ প্ৰাৰ্থীয়ে আকৌ ৯৯, ১০০ আৰু ১০২ নম্বৰৰ বুথত জয় লাভ কৰিছে আৰু বিজেপিয়ে শংকৰীলৰ থানা মকুৱা পঞ্চায়তৰ ১০৫ নম্বৰ বুথত জয় লাভ কৰিছে ।
ৰাজ্যিক নিৰ্বাচন আয়োগে নিৰ্বাচনোত্তৰ হিংসা প্ৰতিহত কৰিবলৈ কঠোৰ পদক্ষেপ গ্ৰহণ কৰিছে । নিৰ্বাচন আয়োগে সকলো জিলা উপায়ুক্ত আৰু আৰক্ষী অধীক্ষকক গণনা কেন্দ্ৰৰ বাহিৰত পৰ্যাপ্ত নিৰাপত্তা ব্যৱস্থা গ্ৰহণৰ নিৰ্দেশ দিছে । খবৰ অনুসৰি টিএমচিয়ে ইতিমধ্যে ১০ খন গাঁও পঞ্চায়ত দখল কৰিছে । ইয়াৰ ভিতৰত, উত্তৰ ২৪ পৰগণাত ৫ খন, পশ্চিম মেদিনীপুৰত ২ খন, পুৰুলিয়া, পূব মেদিনীপুৰ আৰু দক্ষিণ ২৪ পৰগণাত ১ খন কৈ গাঁও পঞ্চায়ত আছে । পশ্চিম বৰ্ধমানৰ চালনপুৰৰ ইথোৰা গাঁও পঞ্চায়ত টিএমচিৰ হাতত আছে ।
পূৰ্ণ বৰ্ধমান জিলাৰ ঘালচি-১ খণ্ডৰ বুদবুদ গাঁও পঞ্চায়ত শাসকীয় দলৰ হাততে আছে । চানকেতুল গাঁও পঞ্চায়তো দখল কৰাৰ দিশত শাসকীয় দল । ইয়াৰ মাজতে আকৌ গণনা কেন্দ্ৰত প্ৰৱেশ কৰিবলৈ অনুমতি নিদিয়াৰ বাবে কাটৱা আৰক্ষী থানাত বিজেপি কৰ্মীসকলে প্ৰতিবাদ সাব্যস্ত কৰা দেখা গৈছে । বিজেপিয়ে অভিযোগ কৰিছে যে কিছুমান ঠাইত তেওঁলোকৰ এজেণ্টসকলক গণনা কেন্দ্ৰত প্ৰৱেশ কৰাত বাধা দিয়া হৈছে ।
ৰাজ্যখনত সংঘটিত নিৰ্বাচনী হিংসাৰ গোচৰত এছএফআইৰ ৰাজ্যিক সভাপতি আৰু চিপিআই(এম)ৰ নেতা প্ৰতীক-উৰ ৰহমানক আৰক্ষীয়ে আটক কৰিছে । ইফালে মাইনাগুৰিৰ এখন বিদ্যালয়ৰ গণনা কেন্দ্ৰত বান্দৰৰ উপদ্ৰৱৰ বাবে কৰ্মচাৰীসকল সমস্যাৰ সন্মুখীন হৈছে ।
লগতে পঢ়ক :Manipur News: 14 জুলাইত মণিপুৰ ভ্ৰমণ কৰিব তৃণমূল কংগ্ৰেছৰ পাঁচজনীয়া প্ৰতিনিধিৰ দলে
