নেশ্যনেল ডেস্ক,২৩ এপ্ৰিল: ত্ৰিপুৰাত তৰমুজ খেতিৰে স্বাৱলম্বী হৈছে এগৰাকী খেতিয়ক । দক্ষিণ ত্ৰিপুৰা জিলাৰ অন্তৰ্গত চাবৰুম সদৰৰ বিশ্বজিৎ মজুমদাৰে তৰমুজ খেতি কৰি এতিয়া ডাঙৰ উদ্যোগ স্থাপন কৰিছে । পূৰ্বে মাটি বন্ধকত লৈ খেতি কৰা বিশ্বজিতে এতিয়া প্ৰায় ৩২ একৰ ভূমিত নিজৰ খেতি সম্প্ৰসাৰিত কৰিছে । ত্ৰিপুৰা আইচিএআৰৰ সহযোগত তেওঁ এটা সৰিয়হ তেলৰ কল স্থাপন কৰিছে । নাবাৰ্ডৰ স্বীকৃতি পোৱা প্ৰগতিশীল কৃষক বিশ্বজিতৰ আশা নিজৰ অঞ্চলতে বিশাল বজাৰ থকা পেকেটযুক্ত সৰিয়হৰ তেল উৎপাদন কৰা ।
তৰমুজৰ খেতি সন্দৰ্ভত তেওঁ কয় যে তৰমুজ খেতি কৰিবলৈ এই বছৰ তেওঁ ২ একৰ ভূমি লীজত লৈছিল । উপাৰ্জনৰ বিষয়ে সোধাত কয় যে তৰমুজৰ জৰিয়তে তেওঁ ৫ লাখ টকাৰ লাভ অৰ্জন কৰিবলৈ সক্ষম হৈছে । বাহিৰত বিক্ৰী কৰাৰ বিপৰীতে তেওঁ দক্ষিণ ত্ৰিপুৰাৰ সাপ্তাহিক বজাৰত সেইবোৰ বিক্ৰী কৰিছিল । তৰমুজৰ উপৰি তেওঁ সৰিহয় কলও স্থাপন কৰিছে । তেওঁ প্ৰতি লিটাৰত ১৫০ টকা মূল্যত সৰিয়হ তেল বিক্ৰী কৰি আছে । ভৱিষ্যত সম্পৰ্কে তেওঁ কয় যে এটা পেকিং ইউনিটৰ সৈতে এই ব্যৱসায় সম্প্ৰসাৰণ কৰাৰ পৰিকল্পনা আছে তেওঁৰ ।
তেওঁৰ মতে ত্ৰিপুৰাৰ প্ৰায় ৯০ শতাংশ মানুহে খাদ্যৰ বাবে সৰিয়হৰ তেল ব্যৱহাৰ কৰে । সেয়ে এই ক্ষেত্ৰত তেওঁ অধিক গুৰুত্ব দিয়াৰ কথা চিন্তা কৰিছে । কেৱল এয়াই নহয় অতি শীঘ্ৰে সৰিয়হ কলটো চলাবলৈ কোনো দায়িত্বশীল লোকক নিযুক্তি দিব বুলিও তেওঁ মন্তব্য কৰে ।
