নেশ্যনেল ডেস্ক, ৮ এপ্ৰিল : যোৱা ৬ এপ্ৰিলত ত্ৰিপুৰাত অনুষ্ঠিত হয় ত্ৰিপুৰা জনজাতীয় অঞ্চল স্বায়ত্ব শাসিত জিলা পৰিষদ (টিটিএডিচি)ৰ নিৰ্বাচন । এই নিৰ্বাচনত প্ৰায় ৮৫ শতাংশ ভোটদান সম্পন্ন হয় । বুধবাৰে টিপ্ৰাৰ অধ্যক্ষ প্ৰদ্যুৎ কিশোৰ দেৱবৰ্মনে টিটিএডিচিৰ স্পৰ্শকাতৰ স্থানৰ মুঠ ৭০ টা ভোটকেন্দ্ৰত বিক্ষিপ্ত ঘটনা সংঘটিত হোৱাত পুনৰ নতুনকৈ নিৰ্বাচন অনুষ্ঠিত কৰাৰ দাবী জনায় । এই সন্দৰ্ভত ৰাজ্যিক নিৰ্বাচন আয়োগক এক প্ৰতিবেদন দাখিল কৰিব বুলি উল্লেখ কৰে প্ৰদ্যুৎ কিশোৰ দেৱ বৰ্মনে ।
বিক্ষিপ্ত ঘটনা সংঘটিত হোৱা ভোটকেন্দ্ৰকেইটাত যিসকল লোকক ভাবুকি দিয়া হৈছিল তৎস্বত্বেও সেইসকল লোকে গণতান্ত্ৰিক অধিকাৰ সাব্যস্ত কৰাৰ বাবে শলাগ লয় অধ্যক্ষগৰাকীয়ে । তিপ্ৰাই সংখ্যাগৰিষ্ঠ আসন লাভ কৰি চৰকাৰ গঠন কৰাৰ বাবে তেওঁ যথেষ্ঠ আত্মবিশ্বাসী বুলি দাবী কৰে । পেকুয়াৰজালা, তাকাৰজালা, অমতালী-গোলাঘাটি আৰু নতুনবজাৰ-মালবাছাৰ দৰে অঞ্চলসমূহত ভোটদান সাব্যস্ত কৰিব যোৱা লোকসকলক বাধা দি আক্ৰমণ কৰা হৈছিল । এই ক্ষেত্ৰত আৰক্ষীয়ে নিৰাপত্তা নিশ্চিত কৰাত ব্যৰ্থ হৈছে বুলি তেওঁ কয় । আনহাতে, একাংশ ঠাইত ভাবুকিও প্ৰদান কৰিছিল বুলি অভিযোগ উত্থাপন কৰে প্ৰদ্যুৎ কিশোৰ দেৱবৰ্মনে ।
এই সকলোবোৰ তথ্য বিশ্লেষণ কৰি তেওঁলোকে ৬০ ৰ পৰা ৭০ টা ভোটকেন্দ্ৰ তালিকাভুক্ত কৰাত পুনৰ নিৰ্বাচন অনুষ্ঠিত কৰাৰ সিদ্ধান্ত গ্ৰহণ কৰে বুলি কয় । ভোটগণনাৰ যাতে সকলোৱে শান্তি-শৃংখলা বজাই ৰাখে তাৰবাবে আহ্বান জনায় দেৱবৰ্মনে ।
লগতে পঢ়ক:দেশৰ নিৰ্বাচন প্ৰক্ৰিয়া স্থগিত ৰাখিবৰ বাবে উচ্চতম ন্যায়ালয়ত আবেদন
