নেশ্যনেল ডেস্ক,৪ নৱেম্বৰ : শুকুৰবাৰে নিশাৰ শক্তিশালী ভূমিকম্পই নেপালত ভয়ংকৰ পৰিৱেশৰ সৃষ্টি কৰিছে । নেপালত ধ্বংসলীলা চলোৱা ভূমিকম্পটোৱে বিহাৰতো ব্যাপক প্ৰভাৱ পেলাইছে । পাটনা, মুংগেৰ, মতিহাৰী, নৱাদা, বক্সাৰ, ভোজপুৰ, জেহানাবাদ, পশ্চিম চম্পাৰণ, মুজাফ্ফৰপুৰ আৰু ছপ্ৰাত ভূমিকম্পৰ জোকাৰণি অনুভৱ হৈছে । বিহাৰত কোনো প্ৰাণহানি বা সম্পত্তি ধ্বংস নহ'লেও ১৯৩৪ চনৰ ১৫ জানুৱাৰীৰ শক্তিশালী ভূমিকম্পৰ কথা পুনৰ এবাৰ সোঁৱৰাই দিলে বিহাৰৰ লোকসকলক । যিটো ভূমিকম্পত হাজাৰ হাজাৰ লোকৰ মৃত্যু হৈছিল । শ শ ঘৰ ধ্বংসস্তুপলৈ পৰিণত হৈছিল ।
১৯৩৪ চনৰ ১৫ জানুৱাৰীৰ ভূমিকম্পটো বিহাৰৰ বাবে আটাইতকৈ ভয়াৱহ আছিল । ভূমিকম্পটোত জীৱন আৰু সম্পত্তিৰ যথেষ্ট ক্ষতি হৈছিল । ১৯৩৪ চনৰ ভয়াৱহ দৃশ্যবোৰ স্মৰণ কৰি বিহাৰৰ লোকসকল এতিয়াও হতবাক হৈ পৰে । ১৯৩৪ৰ ভূমিকম্পটোৰ ৰিখটাৰ স্কেলত তীব্ৰতা আছিল ৮.৪ । দুপৰীয়া ২:১৩ বজাত ভূমিকম্পৰ জোকাৰণি দেখা গৈছিল আৰু প্ৰচণ্ড বজ্ৰপাতো শুনা গৈছিল । সমগ্ৰ বিহাৰ ভূমিকম্পৰ দ্বাৰা জোকাৰি গৈছিল ।
চৰকাৰী পৰিসংখ্যা অনুসৰি, ১৯৩৪ চনৰ ভূমিকম্পত ৭,২৫৩ গৰাকী লোকৰ মৃত্যু হৈছিল । মুংগেৰ, মধুবনী, মুজাফ্ফৰপুৰ, দৰভাঙ্গা আৰু উত্তৰ বিহাৰৰ কেইবাখনো জিলা ভূমিকম্পৰ ফলত আটাইতকৈ বেছি ক্ষতিগ্ৰস্ত হৈছিল । ১৯৩৪ চনৰ ভূমিকম্পৰ ফলত ৰাজ্যখনে যি ধ্বংসৰ সন্মুখীন হৈছিল সেয়া এতিয়াও পাহৰিব পৰা নাই । দৰভাঙ্গা জিলাৰ পৰা সৰ্বাধিক ক্ষতিৰ খবৰ পোৱা গৈছিল, য'ত ১৮৩৯ গৰাকী লোকৰ মৃত্যু হৈছিল । মুজাফ্ফৰপুৰত, ১৫৮৩ গৰাকী লোকৰ মৃত্যু হৈছিল, আনহাতে মুংগেৰত মৃত্যুৰ সংখ্যা আছিল ১২৬০ গৰাকী ।
একে সময়তে, উত্তৰ বিহাৰৰ ৰাজনগৰ ধ্বংসাৱশেষলৈ ৰূপান্তৰিত হৈছিল । ৰাজনগৰৰ ৰামেশ্বৰ বিলাস প্ৰাসাদ সম্পূৰ্ণৰূপে ধ্বংস কৰা হৈছিল । ১৯৩৪ চনৰ ভূমিকম্পটো ইমানেই ভয়ংকৰ আছিল যে মাটি ৬ ৰ পৰা ১২ ফুট তললৈ সোমাই গৈছিল । ২৭ ফুটৰ পৰা ৫০ ফুট গভীৰলৈকে ফাট মেলিছিল । নদীবোৰৰ পাৰ বোৰ সংকুচিত হৈ গৈছিল ।
ভূমিকম্পৰ ফলত মুংগেৰ চহৰ যথেষ্ট প্ৰভাৱিত হৈছিল আৰু সমগ্ৰ মুংগেৰ চহৰ ধ্বংসস্তূপলৈ পৰিণত হৈছিল । সেই দিনত মহাত্মা গান্ধী, ৰাজেন্দ্ৰ প্ৰসাদ আৰু সৰোজিনী নাইডুৰ দৰে মহান নেতাসকলে ধ্বংসাৱশেষৰ বুজ লৈছিল । মুংগেৰ জিলাৰ জামালপুৰ ৰে'ল ষ্টেচন সম্পূৰ্ণৰূপে ধ্বংস হৈ গৈছিল ।
একে সময়তে, মুজাফ্ফৰপুৰত হোৱা ভূমিকম্পৰ ফলত জন-জীৱন কঠিন হৈ পৰিছিল । ধুলি-মাটিৰে আকাশ আৱৰি ধৰিছিল । যাৰ ফলত মানুহে শ্বাস প্ৰশ্বাসত অসুবিধা পাইছিল । বিহাৰৰ ৩৮ খন জিলাৰ ভিতৰত ৮ খন জিলা ভূকম্পন প্ৰৱণ ৫ৰ অধীনত আছে । ২২ খন জিলা ভূকম্পন প্ৰৱণ ৪ৰ অধীনত আছে আৰু মাত্ৰ ৮ খন জিলা ভূকম্পন প্ৰৱণ ৩ৰ অধীনত পৰে ।
লগতে পঢ়ক :Earthquake in Nepal: নেপালত ভূমিকম্পৰ ফলত বৰ্তমানলৈ 132 জনৰ মৃত্যু
