নিউজ ডেস্ক, ২৮ নৱেম্বৰ : জ্যেষ্ঠ কংগ্ৰেছ নেতা ৰাহুল গান্ধীয়ে বিজেপিক সমালোচনা কৰি কয় যে বিজেপিৰ নীতি হৈছে মানুহৰ মাজত ঘৃণা সৃষ্টি কৰি ৰাজনৈতিক লাভালাভ আহৰণ কৰা । তেওঁ কয় যে ভাৰত জোড়ো যাত্ৰাৰ সময়ত বিজেপিয়ে বিয়পোৱা ঘৃণা প্ৰত্যক্ষ কৰিছিল । বিজেপিক প্ৰশ্ন কৰাৰ বাবেই তেওঁৰ বিৰুদ্ধে ২৪ টা গোচৰ ৰুজু কৰা হৈছে ।
ৰাহুল গান্ধীয়ে কয় যে এই ক্ৰমত তেওঁক সাংসদৰ বাসগৃহৰ পৰা উচ্ছেদ কৰাতো তেওঁ আঘাত পোৱা নাছিল । তেওঁ লগতে কয় যে দেশৰ সকলো লোকৰ হৃদয়তে তেওঁৰ বাবে এটা ঘৰ আছে । তেলেংগানা বিধানসভা নিৰ্বাচনৰ প্ৰচাৰ কাৰ্যৰ অন্তিমদিনা তেওঁ হায়দৰাবাদৰ নামপল্লীত অনুষ্ঠিত কংগ্ৰেছৰ সভাত অংশগ্ৰহণ কৰি তেওঁ এই কথা কয় ।
ভাষণ প্ৰসংগত ৰাহুলে তেওঁৰ বিৰুদ্ধে ২৪ টা গোচৰ ৰুজু কৰা বিষয়ত বিজেপিক সমালোচনা কৰি কয় যে ইয়াৰ বিপৰীতে কিন্তু দুৰ্নীতিগ্ৰস্ত কেচিআৰৰ বিৰুদ্ধে এটাও গোচৰ ৰুজু কৰা নাই । তেওঁ কয় যে বিআৰএছে মোদী চৰকাৰে অনা সকলো বিধেয়ক সমৰ্থন কৰিছে । তেওঁ লগতে অভিযোগ কৰে যে কালেশ্বৰাম প্ৰকল্পত লাখ কোটি টকাৰ দুৰ্নীতি হৈছিল । যাৰ বাবে মেদিগাড্ডা প্ৰকল্পৰ পতন ঘটে । তেওঁ লগতে কয় যে যদি বিআৰএছক পুনৰ ভোট দিয়া হয়, তেন্তে অভিজাতসকলৰ চৰকাৰ পুনৰ আহিব । আনহাতে, যদি কংগ্ৰেছ জয়ী হয়, তেন্তে জনতাৰ চৰকাৰ আহিব ।
ৰাহুলে গান্ধীয়ে আৰু যে কংগ্ৰেছ চৰকাৰেহে হায়দৰাবাদক মেট্ৰ' ৰে'ল প্ৰকল্প আৱণ্টন দিছিল । তেওঁ দাবী কৰে যে কংগ্ৰেছেই হায়দৰাবাদক আন্তঃৰাষ্ট্ৰীয় বিমানবন্দৰ দিছিল । কংগ্ৰেছ দলেই বাহ্যিক ৰিং ৰোড প্ৰকল্পটোত অনুমোদন জনাইছিল । যদি আমি ক্ষমতালৈ আহোঁ, আমি দৰিদ্ৰ লোকৰ পৰা কেচিআৰে চুৰি কৰা প্ৰতিটো টকা সংগ্ৰহ কৰিম আৰু দৰিদ্ৰ লোকৰ পকেটত পুনৰ ভৰাই দিম বুলিও তেওঁ প্ৰতিশ্ৰুতি দিয়ে ।
লগতে প্ৰতিটো গেছ চিলিণ্ডাৰ ৪০০ টকাত আৰু কৃষকসকলক প্ৰতি একৰত ১৫ হাজাৰ টকা হাৰত কৃষক বীমা প্ৰদানৰো আশ্বাস দিয়ে ৷ ৰাহুলে কয় যে যুৱ বিকাশমৰ অধীনত শিক্ষাৰ্থীসকলক ৫ লাখ টকাৰ আৰ্থিক সাহায্য প্ৰদান কৰা হ'ব । ইয়াৰ উপৰি প্ৰতিমাহে মহিলাৰ একাউণ্টত ২৫০০ টকাকৈ জমা কৰা হ'ব বুলিও প্ৰতিশ্ৰুতি দিয়ে ।
আনহাতে, নিৰ্বাচনত প্ৰতিদ্বন্দ্বিতা কৰাৰ ক্ষেত্ৰত ভাৰতীয় জনতা আৰু এমআইএমৰ প্ৰাৰ্থীসকলৰ মাজত গোপন বুজাবুজি থকাৰো অভিযোগ উত্থাপন কৰে ৰাহুল গান্ধীয়ে । তেওঁ কয় যে এমআইএম প্ৰাৰ্থীসকলে বিজেপিয়ে কোৱা আসনতহে প্ৰতিদ্বন্দ্বিতা কৰিছে । এমআইএমে কংগ্ৰেছক ক্ষতিগ্ৰস্ত কৰাৰ উদ্দেশ্যৰে নিৰ্বাচনত প্ৰতিদ্বন্দ্বিতা কৰাৰ অভিযোগ কৰে ৰাহুল গান্ধীয়ে । লগতে বিজেপি, বিআৰএছ আৰু এমআইএমে একত্ৰিত হৈ নিৰ্বাচনত প্ৰতিদ্বন্দ্বিতা কৰাৰো দাবী কৰে ।
"বিজেপিৰ নীতি হৈছে মানুহৰ মাজত ঘৃণাৰ সৃষ্টি কৰি ৰাজনৈতিক লাভালাভ আহৰণ কৰা । মই ভাৰত জোড়ো যাত্ৰাৰ সময়ত বিজেপিয়ে বিয়পোৱা ঘৃণা দেখিছিলোঁ । দলটোক বিভিন্ন প্ৰশ্ন কৰাৰ বাবে মোৰ বিৰুদ্ধে ২৪ টা গোচৰ ৰুজু কৰা হৈছে । কিন্তু দুৰ্নীতিগ্ৰস্ত কেচিআৰৰ বিৰুদ্ধে এটাও গোচৰ নাই । বিজেপি, বিআৰএছ আৰু এমআইএম হৈছে একেটা দল । তেওঁলোক সকলোৱে একেলগে কাম কৰে ।" ৰাহুল গান্ধীয়ে কয় ।
লগতে পঢ়ক :ৰাজ্যপালৰ আশ্বাসৰ পাছতে পঞ্চকুলাত কৃষকৰ ৩ দিনীয়া প্ৰতিবাদৰ সমাপ্তি
