নেশ্যনেল ডেস্ক,৩০ নৱেম্বৰ : তেলেংগানাত আজি ভোটগ্ৰহণ অনুষ্ঠিত হৈছে । এইবাৰ তেলেংগানাৰ মুখ্যমন্ত্ৰী কে চন্দ্ৰশেখৰ ৰাওৰ বিৰুদ্ধে কামাৰেড্ডী সমষ্টিত প্ৰতিদ্বন্দিতা আগবঢ়াইছে তেলেংগানা কংগ্ৰেছৰ সভাপতি এ ৰেৱন্ত ৰেড্ডীয়ে । ভোটদানৰ পাছতে ৰেড্ডীয়ে নিৰ্বাচনৰ ফলাফল আৰু মুখ্যমন্ত্ৰীৰ পদক লৈ গুৰুত্বপূৰ্ণ মন্তব্য কৰিছে । সাংবাদিকে তেওঁক প্ৰশ্ন কৰিছিল যে যদি কংগ্ৰেছ ক্ষমতালৈ আহে তেনেহ'লে তেওঁৰ দলে কাক মুখ্যমন্ত্ৰী হিচাপে বাছনি কৰিব ? অৱশ্যে ৰেড্ডীয়ে এই প্ৰশ্নৰ পোনপটীয়া উত্তৰ দিয়াৰ পৰা আঁতৰি থাকে ।
তেওঁ উত্তৰত কয় যে ৮৫ গৰাকী বিধায়ক আছে আৰু সকলোৱে মুখ্যমন্ত্ৰী পদৰ বাবে সক্ষম । এইক্ষেত্ৰত এক প্ৰক্ৰিয়া আছে । যিটো এটা ক্ৰিকেট দল বাছনিৰ দৰে । তেওঁৰ মতে অধিনায়ক চিনাক্ত বা বাছনি কৰাৰ পূৰ্বে প্ৰথমে খেলুৱৈসকলক বাছনি কৰা হয় । তেনেদৰে, দলটো বাছনি কৰাৰ পূৰ্বে অধিনায়কৰ কোনো বাছনি নহয় ।
ৰেড্ডীৰ মতে তেওঁ কেৱল কংগ্ৰেছ দলৰ অধিনায়ক । নিৰ্বাচন শেষ হোৱাৰ পাছত বিধায়কসকলে কংগ্ৰেছ বিধায়িনী দলৰ মুৰব্বী বাছনি কৰিব লাগিব । সেয়ে খৰধৰ কৰাৰ কোনো প্ৰয়োজন নাই বুলি তেওঁ উল্লেখ কৰে ।
