নিউজ ডেস্ক, ৯ জানুৱাৰী: দিল্লীত অব্যাহত থকা কৃষকসকলৰ আন্দোলন সন্দৰ্ভত শনিবাৰে কংগ্ৰেছৰ অন্তৱৰ্তীকালীন অধ্যক্ষা ছোনিয়া গান্ধীয়ে দলৰ সাধাৰণ সম্পাদক আৰু বিষয়ববীয়াৰে এক বৈঠকত মিলিত হ'ব । সূত্ৰ অনুসৰি, পৰিস্থিতি সন্দৰ্ভত আলোচনা আৰু কৃষক আন্দোলনৰ সমৰ্থনৰ ৰণনীতি প্ৰস্তুত কৰিবলৈ ভাৰ্চুৱেল বৈঠক অনুষ্ঠিত কৰা হ'ব ।
ছেপ্তেন্বৰ মাহত কেন্দ্ৰীয় চৰকাৰে প্ৰণয়ন কৰা কৃষকৰ স্বাৰ্থ বিৰোধী আইন প্ৰত্যাহাৰৰ দাবীত কৰা আন্দোলনৰ সমৰ্থন জনাই আহিছে কংগ্ৰেছেও । ইয়াৰ বিৰোধীতাৰে সমগ্ৰ দেশজুৰি আলোড়নৰ সৃষ্টি কৰিব বুলিও কয় ।
ইতিপূৰ্বে গান্ধীয়ে এক মন্তব্য কৰি মোডী নেতৃত্বাধীন চৰকাৰখনক সমোলোচনা কৰি কৈছিল যে স্বাধীনতাৰ পাচৰে পৰা দেশ শাসন কৰা চৰকাৰৰ ভিতৰত এইখন চৰকাৰেই আটাইতকৈ অহংকাৰী চৰকাৰ । লগতে এই আইনক বাতিল কৰি ৰাজ ধৰ্ম পালন কৰিবলৈ আহ্বান জনায় ।
ইফালে কংগ্ৰেছৰ সাধাৰণ সম্পাদক প্ৰিয়ংকা গান্ধী ভদ্ৰাইও শুকুৰবাৰে তিনি নতুন কৃষি আইনৰ বিৰুদ্ধে দিল্লীৰ ভিন্ন প্ৰান্তত অব্যাহত থকা কৃষক আন্দোলন সন্দৰ্ভত মন্তব্য় কৰি কৈছিল যে এই আইনখন বাতিল কৰিবই লাগিব ।
উল্লেখ্য যে, শুকুৰবাৰে কৃষক সংঘ আৰু কেন্দ্ৰৰ অষ্টম পৰ্যায়ৰ বৈঠক অনুষ্ঠিত হৈছিল আৰু পৰৱৰ্তী বৈঠক ১৫ জানুৱাৰীত অনুষ্ঠিত হ'ব ।
কেন্দ্ৰীয় চৰকাৰে তিনিখনকৈ কৃষি আইন বলৱৎ কৰাৰ পিচৰে পৰাই দেশৰ কৃষকসকলে মোডী চৰকাৰৰ বিৰুদ্ধে জাঙুৰ খাই উঠিছে আৰু সেই আইন বাতিলৰ দাবীৰে আন্দোলন চলাই আহিছে । বিশেষকৈ পঞ্জাৱ, হাৰিয়াণাক কৃষকসকলে চৰকাৰৰ বিৰুদ্ধে অধিক সৰৱ হৈ তীব্ৰ আন্দোলন চলাই আহিছে ।
দিল্লী চলো কাৰ্যসূচী লৈ পঞ্জাৱ, হাৰিয়াণাৰ কৃষকসকল ৰাজধানী দিল্লীলৈ আহিছে প্ৰতিবাদ কৰিবলৈ । তেওঁলোকক বাধা দিবলৈ হাৰিয়াণা আৰু দিল্লী সীমান্তত আৰক্ষী প্ৰশাসনে প্ৰৱল চেষ্টা চলোৱাতো বিফল হয় প্ৰতিবাদ নিয়ন্ত্ৰণ কৰিবলৈ ।
লগতে পঢ়ক: প্ৰবাসী ভাৰতীয় দিৱস সন্মিলন উদ্বোধন কৰিব প্ৰধানমন্ত্ৰী নৰেন্দ্ৰ মোদীয়ে
