নেশ্যনেল ডেস্ক, ২২ ছেপ্টেম্বৰ : বাতিল কৰা হ'ল ছাউথ এছিয়ান এছ'চিয়েছন ফৰ ৰিজিঅ'নেল কো-অপাৰেচন(South Asian Association for Regional Cooperation)ৰ বৈদেশিক মন্ত্ৰীসকলৰ বৈঠক । শনিবাৰে নিউয়ৰ্কত অনুষ্ঠিত হ'বলগীয়া আছিল বৈঠকখন । জানিব পৰা মতে, ছাউথ এছিয়ান এছ'চিয়েছন ফৰ ৰিজিঅ'নেল কো-অপাৰেচনৰ বৈঠকখনত আফগানিস্তানক প্ৰতিনিধিত্ব কৰাৰ বাবে তালিবানক অনুমতি দিবলৈ পাকিস্তানে প্ৰস্তাৱ আগবঢ়াইছিল । ভাৰত আৰু আন কেইবাখনো সদস্য ৰাষ্ট্ৰই পাকিস্তানৰ এই প্ৰস্তাৱৰ প্ৰতি সন্মতি জনোৱা নাছিল ।
ৰাষ্ট্ৰসংঘৰ সাধাৰণ সভা অনুষ্ঠিত হোৱাৰ সময়ত প্ৰতিবছৰে এই বৈঠকখন অনুষ্ঠিত হয় । এই বৈঠকখনৰ আয়োজক দেশ আছিল নেপাল । আনহাতে, তালিবানক আজি পৰ্যন্ত ভাৰতে স্বীকৃতি দিয়া নাই । কাবুলৰ নতুন শাসন ব্যৱস্থাক এতিয়াও স্বীকৃতি দিয়া নাই বিশ্বৰ বহু ৰাষ্ট্ৰই । লগতে শীৰ্ষ কেবিনেট মন্ত্ৰীসকলক ৰাষ্ট্ৰসংঘৰ দ্বাৰা ব্লেকলিষ্টেড কৰা হৈছে ।
আমিৰ খান মুত্তাকী আফগানিস্তানৰ তালিবান নেতৃত্বাধীন চৰকাৰৰ কাৰ্যকৰী বৈদেশিক মন্ত্ৰী আৰু তেওঁ ৰাষ্ট্ৰসংঘৰ বৈঠকত অংশ লোৱাৰ সম্ভাৱনা নাই । দৰাচলতে, যোৱা সপ্তাহত সাংঘাই সহযোগিতা সংস্থাৰ (Shanghai Cooperation Organization)বৈঠকত প্ৰধানমন্ত্ৰী নৰেন্দ্ৰ মোডীয়ে কয় যে, বিশ্বই আফগানিস্তানত তালিবানৰ শাসনক স্বীকৃতি দিয়াৰ আগতে চিন্তা কৰিব লাগিব ।
তেওঁ লগতে কয় যে, তালিবান নেতৃত্বাধীন চৰকাৰত মহিলা, সংখ্যালঘুসকলৰ কোনো প্ৰতিনিধিত্ব নাই । ছাউথ এছিয়ান এছ'চিয়েছন ফৰ ৰিজিঅ'নেল কো-অপাৰেচন হৈছে দক্ষিণ এছিয়াৰ আঠখন দেশৰ আঞ্চলিক সংগঠন । ইয়াৰ সদস্য ৰাষ্ট্ৰকেইখন হৈছে-বাংলাদেশ, ভূটান, ভাৰত, মালদ্বীপ, নেপাল, আফগানিস্তান, পাকিস্তান আৰু শ্ৰীলংকা ।
কিন্তু তালিবানে আফগানিস্তানৰ শাসনৰ বাঘজৰী নিজৰ হাতলৈ নিয়াৰ পাছতে সংগঠনৰ সদস্যতাৰ ক্ষেত্ৰতো প্ৰশ্ন উত্থাপন হৈছে । জানিব পৰা গৈছে যে, অধিকাংশ সদস্য ৰাষ্ট্ৰই সন্মত হৈছিল যে, বৈঠকত আফগানিস্তানৰ আসন খালী থাকিব । কিন্তু পাকিস্তান সন্মত হোৱা নাছিল আৰু আফগানিস্তানক প্ৰতিনিধিত্ব কৰাৰ বাবে তালিবানক অনুমতি দিবলৈ প্ৰস্তাৱ দিছিল । অৱশেষত বৈঠকখন বাতিল কৰা হয় ৷
লগতে পঢ়ক: উৰিত সেনাৰ অভিযান অব্যাহত
