নেশ্যনেল ডেস্ক, ২২ জুলাই: বিভিন্ন বিতৰ্কৰে বিৰোধীয়ে সদনত হুলস্থূল অব্যাহত ৰখাৰ মাজতে বৃহস্পতিবাৰে দিনটোৰ বাবে ৰাজ্যসভা(Rajya Sabha) আৰু লোকসভা(Lok Sabha)ৰ অধিৱেশন স্থগিত ৰখা হয় । অৱশ্যে কিছু সময়ৰ বাবে লোকসভাৰ অধিৱেশন আৰম্ভ হৈছিল । সদনত অত্যাৱশ্যকীয় প্ৰতিৰক্ষা সেৱা বিধেয়ক ২০২১(Essential Defence Services Bill 2021) উত্থাপন কৰাৰ পাছত দুপৰীয়া ২ বজালৈ সদন স্থগিত ৰখা হয় । জানিব পৰা মতে, জাহাজ পৰিবহণ মন্ত্ৰী সৰ্বানন্দ সোণোৱালে(Sarbananda Sonowal) নিম্ন সদনত আভ্যন্তৰীণ জাহাজ বিধেয়ক ২০২১ উত্থাপন কৰে ।
বিৰোধীয়ে ৰাজ্যসভাত সংবাদ মাধ্যমৰ কাৰ্যালয়ত অভিযান চলোৱা বিষয়টো উত্থাপন কৰাৰ পাছতে এক হূলস্থূলীয়া পৰিৱেশৰ সৃষ্টি হয় । একাংশ সদস্যই সমস্যা সৃষ্টি কৰি আছে বুলি কৈ অধ্যক্ষ ভেংকায়া নাইডুৱে সদন স্থগিত কৰাৰ কথা ঘোষণা কৰে । বিৰোধী দলে কৃষক আন্দোলন, পেগাচাছ, মুদ্ৰাস্ফীতি, ক'ভিড-১৯ মহামাৰী আৰু সংসদৰ অন্যান্য বিষয়বোৰ উত্থাপন কৰিবলৈ সাজু হৈছে । বিৰোধীয়ে ব্যৱসায় উপদেষ্টা সমিতিৰ (Business Advisory Committee) বৈঠকত উচ্চ সদনত বিষয়বোৰ উত্থাপন কৰাৰ দাবী জনাইছিল ।
