নিউজ ডেস্ক, ১২ জুলাই : গুজৰাটত কংগ্ৰেছ নেতা ৰাহুল গান্ধীৰ বিৰুদ্ধে মানহানিৰ গোচৰৰ অভিযোগকাৰী পূৰ্ণেশ মোদী এইবাৰ কাষ চাপিছে ছুপ্ৰিম কোৰ্টৰ । গুজৰাট উচ্চ ন্যায়ালয়ৰ ৰায়ক প্ৰত্যাহ্বান জনাই ৰাহুল গান্ধীৰ আপীলৰ আশংকা কৰিয়ে উচ্চতম ন্যায়ালয়ত তেওঁ কেভিয়েট বা এক সতৰ্কবাণী দাখিল কৰিছে । উল্লেখ্য, ৭ জুলাইত উচ্চ ন্যায়ালয়ে ৰাহুল গান্ধীৰ মোদী উপাধিৰ ওপৰত অপৰাধমূলক মানহানিৰ গোচৰত দোষী সাব্যস্ত হোৱাৰ ওপৰত স্থগিতাদেশ বিচাৰি কৰা আবেদন প্ৰত্যাখ্যান কৰে ।
দেশৰ সৰ্বোচ্চ ন্যায়ালয়ৰ ৱেবছাইট অনুসৰি, ৭ জুলাইত কেভিয়েট দাখিল কৰা হৈছে । উল্লেখ্য, কংগ্ৰেছে ইতিমধ্যে কৈছে যে তেওঁলোকে গুজৰাট উচ্চ ন্যায়ালয়ৰ ৰায়ক প্ৰত্যাহ্বান জনাই উচ্চতম ন্যায়ালয়লৈ যাব । আনহাতে, যদি আদালতত কেভিয়েট দাখিল কৰা হয় তেন্তে আদালতে যিকোনো আদেশ দিয়াৰ পূৰ্বে দুয়োপক্ষৰ শুনানি ল'ব লাগিব । গোচৰটোৰ ৰায় প্ৰদান কৰা উচ্চ ন্যায়ালয়ৰ ন্যায়াধীশ হেমন্ত প্ৰচ্ছকে আবেদনখন অস্বীকাৰ কৰিছিল । আদালতে 'মোদী উপাধি' মন্তব্যৰ বিৰুদ্ধে মানহানিৰ গোচৰত ৰাহুল গান্ধীৰ দোষী সাব্যস্ত হোৱাৰ ওপৰত স্থগিতাদেশ অস্বীকাৰ কৰি সত্ৰ আদালতৰ আদেশকে বাহাল ৰাখে ।
আনহাতে, ন্যায়াধীশজনে পূৰ্বতে আবেদনৰ শুনানিৰ সময়ত অযোগ্য সাংসদৰ দ্বাৰা বিচৰা অনুসৰি অন্তৰ্ৱৰ্তীকালীন সকাহ প্ৰদান কৰিবলৈও অস্বীকাৰ কৰিছিল । ইফালে ৰাহুল গান্ধীৰ অধিবক্তাই যুক্তি দিছিল যে তেওঁৰ মক্কেলক যদি জামিনযোগ্য, অজ্ঞাত অপৰাধৰ বাবে সৰ্বাধিক দুবছৰৰ শাস্তি বিহা হয় তেন্তে তেওঁৰ লোকসভাৰ আসন 'স্থায়ী আৰু অপৰিৱৰ্তনীয়ভাৱে' হেৰুৱাব । এই পৰিণাম ৰাহুল গান্ধীৰ ব্যক্তিগতভাৱে আৰু তেওঁ প্ৰতিনিধিত্ব কৰা সমষ্টি দুয়োটাৰে বাবে এক গুৰুতৰ অতিৰিক্ত বোজা বুলি গণ্য কৰা হৈছে । অধিবক্তাগৰাকীয়ে এই ফলাফলৰ অপৰিৱৰ্তনীয় প্ৰকৃতিৰ ওপৰত গুৰুত্ব আৰোপ কৰিছিল ।
উল্লেখ্য যে ৰাহুল গান্ধীৰ বিৰুদ্ধে অপৰাধমূলক মানহানিৰ গোচৰটো কৰ্ণাটকৰ কোলাৰত এক নিৰ্বাচনী জনসভাৰ সময়ত কৰা তেওঁৰ ২০১৯ চনৰ মন্তব্যৰ পৰা উদ্ভৱ হৈছিল । চুৰাট ৱেষ্টক প্ৰতিনিধিত্ব কৰি ভাৰতীয় জনতা পাৰ্টীৰ বিধায়ক পূৰ্ণেশ মোদীয়ে ৰাহুল গান্ধীৰ 'সকলো চোৰৰ উমৈহতীয়া উপাধি মোদী কিয়' বুলি কৰা মন্তব্যৰ ওপৰত গোচৰটো তৰিছিল ।
ইয়াৰে পৰিপ্ৰেক্ষিতত ২০২৩ চনৰ ২৩ মাৰ্চত চুৰাটৰ এখন মেট্ৰ'পলিটান মেজিষ্ট্ৰেটৰ আদালতে ৰাহুল গান্ধীক অপৰাধমূলক মানহানি সম্পৰ্কীয় ভাৰতীয় দণ্ডবিধিৰ (আইপিচি) ৪৯৯ আৰু ৫০০ ধাৰাৰ অধীনত দোষী সাব্যস্ত কৰে আৰু তেওঁক দুবছৰৰ কাৰাদণ্ড বিহে ।
