নেশ্যনেল ডেস্ক, ৯ এপ্ৰিল: দেশত শেহতীয়াকৈ COVID-১৯ ৰ সংক্ৰমণৰ প্ৰতি লক্ষ্য ৰাখি কংগ্ৰেছৰ সাধাৰণ সম্পাদক প্ৰিয়ংকা গান্ধী বাদ্ৰাই চিবিএচই ব'ৰ্ডৰ পৰীক্ষাসমূহ বাতিল বা পুনৰ নিৰ্ধাৰণ কৰিবলৈ দাবী জনায় । লগতে শিক্ষাৰ্থীসকলক চিবিএছই ব'ৰ্ড পৰীক্ষাত অৱতীৰ্ণ হ'বলৈ বাধ্য কৰোৱাটো দায়িত্বজ্ঞানহীন কাণ্ড বুলিও কয় । ব'ৰ্ডৰ পৰীক্ষাবোৰ হয় বাতিল কৰিব লাগে নহ'লে শিক্ষাৰ্থীসকল শাৰীৰিকভাৱে উপস্থিত নথকাকৈয়ে অনুষ্ঠিত কৰাৰ ব্যৱস্থা কৰিব লাগে বুলি শুকুৰবাৰে টুইটাৰযোগে কয় গান্ধীয়ে ।
চিবিএছই ব'ৰ্ড পৰীক্ষা ২০২১ ৰ অনুসৰি, দশম শ্ৰেণীৰ পৰীক্ষা ৪ মে'ৰ পৰা ৭ জুনৰ ভিতৰত অনুষ্ঠিত হ'ব আৰু দ্বাদশ শ্ৰেণীৰ পৰীক্ষা ৪ মে'ৰ পৰা ১৫ জুনৰ ভিতৰত অনুষ্ঠিত হ'ব । গতিকে আগন্তুক পৰীক্ষাৰ বাবে শিক্ষাৰ্থীসকলে অনলাইন পৰীক্ষা অনুষ্ঠিত কৰিবলৈ দাবী জনাইছে । এই সন্দৰ্ভত ইতিমধ্যে এক লাখতকৈও অধিক শিক্ষাৰ্থীয়ে চিবিএছই ব'ৰ্ডলৈ আবেদন জনাইছে । উল্লেখযোগ্য যে, দেশত বিগত কেইদিনমানৰ পৰা প্ৰতিদিনে এক লাখৰো অধিক লোক COVID-১৯ ত আক্ৰান্ত হৈছে । চৰকাৰী তথ্য অনুসৰি প্ৰায় ১.৩২ লাখ লোক নতুনকৈ COVID-১৯ ত আক্ৰান্ত হৈছে ।
লগতে পঢ়ক: উৎকোচ লৈ থকা সময়তে হাতে-লোটে কৰায়ত্ত স্বাস্থ্য বিষয়া
