নেশ্যনেল ডেস্ক,৩ জুলাই : সংসদীয় স্থায়ী সমিতিয়ে ইউনিফৰ্ম চিভিল কোড (ইউচিচি) সন্দৰ্ভত সোমবাৰে এক গুৰুত্বপূৰ্ণ বৈঠকৰ আহ্বান কৰিছে । এই বৈঠকত সংসদীয় স্থায়ী সমিতিয়ে ইউচিচি সম্পৰ্কে সকলো অংশীদাৰৰ মতামত গ্ৰহণ কৰিব । কৰ্মচাৰী, ৰাজহুৱা অভিযোগ, আইন আৰু ন্যায়াধীশৰ স্থায়ী সমিতিৰ মুৰব্বী সুশীল মোদীয়ে এই সন্দৰ্ভত কয় যে পেনেলে বিষয়টোত সকলো অংশীদাৰৰ মতামত শুনিব ।
তেওঁ কয় যে সমিতিখনৰ বৈঠকখন অ-ৰাজনৈতিক কিয়নো পেনেলখনত সকলো ৰাজনৈতিক দলৰ সদস্য আছে । ইতিমধ্যে সদস্যসকলক কোৱা হৈছে যে কৰ্মচাৰী, ৰাজহুৱা অভিযোগ, আইন আৰু ন্যায় সম্পৰ্কীয় বিভাগৰ সংসদীয় স্থায়ী সমিতিৰ পৰৱৰ্তী বৈঠক সোমবাৰে অনুষ্ঠিত হ'ব ।
যোৱা সপ্তাহত, প্ৰধানমন্ত্ৰী নৰেন্দ্ৰ মোদীয়ে ভূপালত এক ৰেলীত অংশগ্ৰহণ কৰি ইউচিচিৰ বিষয়টো উত্থাপন কৰিছিল । যিয়ে সমগ্ৰ দেশতে ব্যাপক প্ৰতিক্ৰিয়াৰ সৃষ্টি কৰিছে । বিৰোধী দলবোৰেও প্ৰধানমন্ত্ৰী নৰেন্দ্ৰ মোদীৰ লগতে বিজেপিক সমালোচনা কৰা দেখা গৈছে । শাসকীয় দলৰ মেৰুকৰণৰ কৌশল বুলিও দাবী কৰিছে বিৰোধীয়ে । প্ৰধানমন্ত্ৰী মোদীয়ে কৈছিল যে এখন দেশত দুখন আইন থাকিব নোৱাৰে আৰু বিৰোধী দলবোৰক বিষয়টোক লৈ ভোট বেংকৰ ৰাজনীতি কৰি থকাৰ অভিযোগ উত্থাপন কৰিছিল । প্ৰতিবেদন অনুসৰি কেন্দ্ৰই ২০ জুলাইৰ পৰা আৰম্ভ হ'বলগীয়া সংসদৰ আগন্তুক বৰ্ষাকালীন অধিৱেশনৰ সময়ত ইউচিচি কাৰ্যকৰী কৰাৰ ওপৰত এখন বিধেয়ক উত্থাপন কৰিব পাৰে ।
ইয়াৰ পূৰ্বে, আইন আয়োগে ইউচিচি পৰীক্ষা কৰাৰ বাবে সাধাৰণ লোক আৰু স্বীকৃত ধৰ্মীয় সংগঠনবোৰৰ পৰা মতামত বিচাৰিছিল । কেন্দ্ৰীয় মন্ত্ৰী পীয়ুষ গোৱেলে এখন সংবাদমেলত কৈছিল যে সকলো দলে ইউচিচিক সমৰ্থন কৰিব বুলি তেওঁ আশাবাদী । সংবিধানৰ অনুচ্ছেদ ৪৪-ৰ অধীনত অহা ইউচিচিয়ে দেশৰ বাবে এখন আইন প্ৰস্তুত কৰাৰ আহ্বান জনাইছে যি বিবাহ, বিবাহ বিচ্ছেদ, উত্তৰাধিকাৰ আৰু শিশু তুলি লোৱাৰ দৰে বিষয়ত সকলো ধৰ্মীয় সম্প্ৰদায়ৰ বাবে প্ৰযোজ্য হ'ব । বৰ্তমান সম্প্ৰদায়বোৰৰ নিজা ব্যক্তিগত আইন আছে ।
