নেশ্যনেল ডেস্ক,27 এপ্ৰিল: মঙলবাৰে ৰাজধানী চহৰ দিল্লীত উপস্থিত হ'ল জীৱনদায়িনী অক্সিজেন কঢ়িয়াই অনা প্ৰথমখন অক্সিজেন এক্সপ্ৰেছ ৷ মহামাৰী কৰ'ণাই দেশৰ ৰাজধানীত এক ভয়াৱহ ৰূপ ধাৰণ কৰাৰ পাচতে অক্সিজেনৰ অভাৱত বহু ৰোগীয়ে মৃত্যুক আঁকোৱালি ল'বলগীয়া হৈছে ৷ তাৰ পাচতে ছত্তিশগড়ৰ ৰায়গড়ৰ পৰা 70 টন অক্সিজেন কঢ়িয়াই অনা প্ৰথমখন এক্সপ্ৰেছ ৰাজধানী চহৰত উপস্থিত হয় বুলি ৰে'ল বিভাগে সদৰী কৰে ৷
কেন্দ্ৰীয় ৰে'ল মন্ত্ৰী পীযুষ গোৱেলে এক টুইটযোগে কয় যে, দিল্লীৰ ক'ভিড ৰোগীসকলৰ বাবে চৰকাৰখনে সকলো ধৰণৰ চেষ্টা অব্যাহত ৰখিছে ৷ সমগ্ৰ দেশতে জীৱনদায়িনী অক্সিজেনৰ অভাৱ হৈছে ৷ যদিও মঙলবাৰে অহা অক্সিজেনে ৰোগীসকলক কিছু সকাহ দিব ৷ ইতিমধ্যে আংগুল, কলিংনগৰ, ৰুড়কেলা আৰু ৰায়পুৰৰ পৰা দিল্লীলৈ অক্সিজেন অনাৰ পৰিকল্পনা কৰা হৈছে যদিও দ্বিতীয়খন এক্সপ্ৰেছ সন্দৰ্ভত কোনো তথ্য নাই ৷
উল্লেখ্য যে, দিল্লী স্বাস্থ্য বিভাগে ইতিমধ্যে চিকিৎসালয়সমূহলৈ অক্সিজেন প্ৰেৰণৰ সকলো ব্যৱস্থা কৰিছে ৷ চৰকাৰী তথ্য মতে, চহৰখনত সোমবাৰৰ দিনটোত মুঠ 380 গৰাকী আক্ৰান্তৰ মৃত্যু হৈছে ৷
লগতে পঢ়ক: দেশত ২৪ ঘণ্টাত নতুনকৈ আক্ৰান্ত ৩.২৩ লাখ লোক
