নেশ্যনেল ডেস্ক,১৪ জুলাই : প্ৰসংগ কেন্দ্ৰীয় মন্ত্ৰী নীতিন গাডকাৰীক ভাবুকিৰ গোচৰ । মন্ত্ৰীগৰাকীক ভাবুকি প্ৰদানৰ গোচৰটোৰ তদন্তত নতুন তথ্য পোহৰলৈ আহিছে । সূত্ৰৰ পৰা জানিব পৰা মতে এই গোচৰৰ মূল অভিযুক্ত জয়েশ পূজাৰীয়ে সন্ত্ৰাসবাদী সংগঠন লস্কৰ-ই-তৈবা আৰু পিএফআইৰ হৈ কাম কৰি আছিল । লগতে, গাডকাৰীক ভাবুকি দিয়াৰ গোচৰটোৰ তদন্ত এইটোও পোহৰলৈ আহিছে যে লস্কৰ-ই-তৈবাৰ বিশেষ দায়িত্বত থকা বিষয়া পাশা হৈছে এই ঘটনাৰ মাষ্টাৰমাইণ্ড ।
সম্প্ৰতি নীতিন গাডকাৰীক ভাবুকি প্ৰদানৰ গোচৰটোত গ্ৰেপ্তাৰ হৈ জয়েশ পূজাৰী নাগপুৰ কাৰাগাৰত আছে । অনুসন্ধানৰ সময়ত পোহৰলৈ আহিছে যে পূজাৰীয়ে বহু নেতাক ভাবুকি দিছিল । যিহেতু এইটো এটা সংবেদনশীল বিষয়, NIAয়েও বিষয়টো অনুসন্ধান কৰি আছে । মাষ্টাৰমাইণ্ড পাশা আকৌ বেলগাম কাৰাগাৰত বন্দী হৈ আছে আৰু তেওঁৰ বিৰুদ্ধে ২০০৩ চনত বাংলাদেশৰ ঢাকা আৰু ২০০৮ চনত বেংগালুৰুত বোমা বিস্ফোৰণ সংঘটিত কৰাৰ অভিযোগ আছে ।
নাগপুৰ আৰক্ষীয়ে পাশাৰ বিৰুদ্ধে এটা গোচৰ ৰুজু কৰিছে । আৰক্ষী আয়ুক্ত অমিতেশ কুমাৰে জনাইছে যে নাগপুৰ আৰক্ষীৰ এটা দলে পাশাক গ্ৰেপ্তাৰ কৰিবলৈ বেলগামলৈ ৰাওনা হৈছে ।
উল্লেখ্য যে এই বছৰৰ আৰম্ভণিতে, নাগপুৰত নীতিন গাডকাৰীৰ জনসম্পৰ্ক কাৰ্যালয়ক কৰ্ণাটক ৰাজ্যৰ বেলগাম কাৰাগাৰৰ পৰা জয়েশ পূজাৰীয়ে দুমাহৰ ভিতৰত মুক্তিপণ দাবী কৰি দুটা ভাবুকিপূৰ্ণ ফোন কৰিছিল । নাগপুৰ আৰক্ষীয়ে এই সন্দৰ্ভত নাগপুৰত দুটা গোচৰ ৰুজু কৰিছে । এই গোচৰটোৰ তদন্ত হাতত লোৱাৰ পাছত NIAয়ে বেংগালুৰুত এটা গোচৰ ৰুজু কৰিছে । ইতিমধ্যে খবৰ পোৱা গৈছে যে জয়েশ পূজাৰী ওৰফে ইলিয়াছ চাকিল 'ডি গেং'ৰ সদস্যসকলৰ সৈতে সম্পৰ্কত আছে । এইটোও প্ৰকাশ পাইছে যে তেওঁ কিছুমান গুণ্ডাক সাক্ষাৎ কৰাৰ পাছত কৰ্ণাটকৰ কাৰাগাৰলৈ আহি তাৰ পৰাই তেওঁৰ ৰেকেট চলাই আছিল ।
জয়েশ পিএফআইৰ সৈতেও সম্পৰ্কত আছিল । জয়েশ পূজাৰীৰ সন্ত্ৰাসবাদী সংগঠনৰ সৈতেও সম্পৰ্ক আছিল আৰু নাগপুৰ আৰক্ষীয়ে তেওঁৰ বিৰুদ্ধে ইউএপিএৰ অধীনত গোচৰ ৰুজু কৰিছিল । পূজাৰীয়ে পিএফআই ৰাষ্ট্ৰীয় কাৰ্যবাহী পৰিষদৰ সম্পাদক মহম্মদ আফছাৰ পাশাৰ সৈতে যোগাযোগ স্থাপন কৰিছিল । অনুসন্ধানত প্ৰকাশ পাইছে যে তেওঁ আন এটা মৌলবাদী সংগঠনৰ কাৰ্যালয়ৰ সৈতেও যোগাযোগ ৰাখিছিল ।
লগতে পঢ়ক :Nitin Gadkari threatening call case : NIA য়ে তদন্ত কৰিব নীতিন গাডকাৰীক ভাবুকি প্ৰদান গোচৰৰ
