নিউজ ডেস্ক, 13 ডিচেম্বৰ: নাইজেৰিয়াৰ উত্তৰাঞ্চলৰ ৰাজ্য কাটচিনাৰ এখন বিদ্যালয়ত সংঘটিত হৈছে শিহৰণকাৰী ঘটনা ৷ অস্ত্ৰধাৰী দুৰ্বৃত্তৰ দলৰ ভয়ংকৰ আক্ৰণত আহত এখন বৰ্ডিং স্কুলৰ বহু ছাত্ৰ ৷ ঘটনা সংঘটিত হোৱা বিদ্যালয় খনৰ পৰা 400 গৰাকীতকৈয়ো অধিক শিশুক অপহৰণ কৰাৰ আশংকা ব্যক্ত কৰিছে প্ৰশাসনে ৷ শুকুৰবাৰে নিশা ৰাজ্যখনৰ কানকাৰা চৰকাৰী বিজ্ঞান উচ্চতৰ মাধ্যমিক বিদ্যালয়ত অচিনাক্ত বন্দুকধাৰী গোটে আক্ৰমণ কৰাৰ পাচতে এতিয়া এক আতংকময় পৰিৱেশে বিৰাজ কৰিছে অভিভাৱক সকলৰ মাজত ৷ ঘটনাৰ বিৱৰণী অনুসৰি, প্ৰায় 800 তকৈ অধিক ছাত্ৰ থকা বিদ্যালয় খনত শুকুৰবাৰে নিশা অতৰ্কিতে আক্ৰমণ কৰে অচিনাক্ত দুৰ্বৃত্তৰ দলে ৷ বিদ্যালয় খনৰ নিৰাপত্তাৰক্ষীক গুলীয়াই হত্যা কৰাৰ পাচতে বিদ্যালয় খনত প্ৰৱেশ কৰি অতৰ্কিতে গুলীচালনা কৰে দুৰ্বৃত্তৰ দলটোৱে ৷ বিপদৰ উমান পাই ততাতৈয়াকৈ ঘটনাস্থলীৰ পৰা বহু ছাত্ৰ পলাই সাৰিবলৈ সক্ষম হয় যদিও, বৰ্তমানলৈকে নিৰুদ্দেশ হৈ আছে 400 জনৰো অধিক ছাত্ৰ ৷ এই সকল ছাত্ৰক দুৰ্বৃত্তৰ দলটোৱে অপহৰণ কৰি নিয়াৰ আশংকা ব্যক্ত কৰিছে প্ৰশাসনে ৷ কাটচিনাৰ শিক্ষা সচিব বাদামাচি চাৰাঞ্চিয়ে প্ৰকাশ কৰা অনুসৰি বহু ছাত্ৰই আক্ৰমণৰ পাছত বাছতে নিশা কটাই আৰু পুৱা বিদ্যালয়ত উপস্থিত হয় ৷
বৰ্তমান নিৰুদ্দেশ হোৱা ছাত্ৰ সকলৰ সন্ধানৰ বাবে বৰ্তমান কাটচিনাৰ আৰক্ষীৰ লগতে স্থল সেনা আৰু বায়ু সেনাই তদন্ত অব্যাহত ৰাখিছে ৷ কাটচিনা আৰক্ষীৰ মুখপাত্ৰ গেম্ব' ইচাহে প্ৰকাশ কৰিছে এই কথা ৷ আক্ৰমণ সংঘটিত হোৱা বিদ্যালয় খন সাময়িকভাৱে বন্ধ ৰখাৰ নিৰ্দেশ প্ৰদান কৰিছে কাটচিনাৰ ৰাজ্যপাল আমিনো বেল'য়ে ৷ ঘটনাৰ ক্ষিপ্ৰ তদন্ত কৰি দোষীক বিচাৰি উলিওৱাৰ নিৰ্দেশ প্ৰদান কৰিছে নাইজেৰিয়ান ৰাষ্ট্ৰপতি মুহাম্মাদো বুহাৰীয়ে ৷ লগতে নিৰুদ্দেশ হোৱা শিশু সকলক শীঘ্ৰে বিচাৰি উলিয়াবলৈ নিৰ্দেশ প্ৰদান কৰিছে ৰাষ্ট্ৰপতি গৰাকীয়ে ৷
লগতে পঢ়কঃ ক’ভিড-19ত আক্ৰান্ত বিজেপিৰ ৰাষ্ট্ৰীয় সভাপতি জে.পি নাড্ডা
