নেশ্যনেল ডেস্ক, ৯ এপ্ৰিল: আপোন ঘৰ, স্বদেশ এৰি মিজোৰামত আশ্ৰয় লোৱা ম্যানমাৰৰ শৰণাৰ্থীসকলক সহায় কৰিবলৈ আগবাঢ়ি আহিছে মিজো জিৰলাই পাৱল আৰু আমেৰিকা যুক্তৰাষ্ট্ৰৰ চিন ব্যাপ্টিষ্ট চাৰ্চে । ম্যানমাৰৰ শৰণাৰ্থীসকলৰ মাজত ৩০.৪ লাখ টকাৰ সাহায্য প্ৰদান কৰাৰ লগতে খাদ্য সামগ্ৰী বিতৰণ কৰে সংস্থা দুটাই ।
চলিত বৰ্ষৰ ফেব্ৰুৱাৰী মাহত ম্যানমাৰত সামৰিক অভ্যত্থানৰ পিছত সেনা বাহিনীৰ অত্যাচাৰৰ পৰা ৰক্ষা পাবলৈ নিজ দেশ এৰি পলায়ন কৰিছিল ম্যানমাৰৰ বহু নাগৰিকে । বৰ্তমান মিজোৰামৰ বিভিন্ন গাঁৱত আশ্ৰয় লৈ এই সকল লোকে ।
মিজো জিৰলাই পাৱল সাধাৰণ সম্পাদক লালনুনমাৱিয়া পুটুৱে কয় যে, ম্যানমাৰৰ পৰা সকলো ভাই-ভনীক তেওঁলোকে আশ্বাস দিছে যে মিজোৰামৰ লোকসকলে তেওঁলোকৰ পৰিস্থিতি বুজি পাইছে আৰু প্ৰয়োজনীয় সহায় আগবঢ়াব বিচাৰে ৷
লগতে তেওঁলোকক ভাল অতিথি হৈ থাকিবলৈ আৰু কোনো সমস্যা সৃষ্টি নকৰিবলৈ অথবা অবৈধ কাৰ্যকলাপত লিপ্ত নহ'বলৈ অনুৰোধ কৰে সাধাৰণ সম্পাদকগৰাকীয়ে । ফাৰকাৱন, খাৱবুং, থেকটে আৰু থেকপুই গাঁৱত আশ্ৰয় লৈ থকা ম্যানমাৰৰ শৰণাৰ্থীসকলক নগদ ৩০.৪ লাখ টকা প্ৰদান কৰাৰ লগতে চাউল, দাইল, আলু আদি প্ৰদান কৰা হয় ।
লগতে পঢ়ক:COVID-১৯ প্ৰতিষেধকৰ ৰপ্তানি বন্ধৰ দাবীৰে প্ৰধানমন্ত্ৰীলৈ পত্ৰ ৰাহুলৰ
