নেশ্যনেল ডেস্ক, ২৩ জানুৱাৰী : বসন্ত পঞ্চমীলৈ মাজত মাত্ৰ দুটা দিন বাকী । এইবাৰ গণৰাজ্য দিৱস আৰু বসন্ত পঞ্চমী একেদিনাই পালন কৰা হ'ব (Basant Panchami 2023)। ইতিমধ্যে বসন্ত পঞ্চমীক লৈ দেশৰ ভিন্ন প্ৰান্তত প্ৰস্তুতি চলিছে । বিশেষকৈ বজাৰত উভৈনদী হৈছে বিভিন্ন প্ৰকাৰৰ চিলা । উত্তৰ প্ৰদেশৰ বজাৰত আকৌ ওলাইছে ২৫ লাখ টকাৰ চিলা । এই বিশেষ চিলাখনে এতিয়া দেশত ব্যাপক চৰ্চা লাভ কৰিছে ।
বসন্ত পঞ্চমী উপলক্ষে উত্তৰ প্ৰদেশৰ মীৰাটত নিৰ্মাণ কৰা হৈছে এই মূল্যৱান চিলাখন । আপুনি হয়তো ভাবিছে এই চিলাৰ মূল্য কিয় ২৫ লাখ টকা ? আচলতে সোণেৰে নিৰ্মাণ কৰা হৈছে এই চিলাখন (Gold Kite of Meerut)। সোণাৰিসকলে চিলাৰ লগতে মাঞ্জা আৰু উঘাও সোণেৰে নিৰ্মাণ কৰিছে । চিলাখন নিৰ্মাণ কৰা শিল্পীসকলে দাবী কৰে যে ই পৃথিৱীৰ আটাইতকৈ ব্যয়বহুল চিলা (World most expensive kite in Meerut)।
উল্লেখ্য যে সমগ্ৰ দেশতে সোণৰ গহনা নিৰ্মাণৰ ক্ষেত্ৰত মীৰাটৰ এক সুকীয়া স্থান আছে । যাৰ বাবে ইয়াক সোণালী চহৰ হিচাপেও জনা যায় । এই মীৰাটতে সোণাৰিসকলে চিলা প্ৰস্তুত কৰি অভিলেখ গঢ়িছে ।
আচলতে, মীৰাটৰ এগৰাকী সোণৰ ব্যৱসায়ীয়ে এই ২৫ লাখ টকাৰ চিলাখন প্ৰস্তুত কৰাইছে (Gold Kite worth 25 lakh)। এই চিলাখন সম্পূৰ্ণৰূপে সোণেৰে প্ৰস্তুত কৰা হৈছে । ব্যৱসায়ী অংকুৰ জৈনে কয় যে, এই চিলাখন মীৰাটৰ ৭ গৰাকী শিল্পীয়ে ১৬ দিনৰ ভিতৰত প্ৰস্তুত কৰিছে । জৈনৰ মতে তেওঁ চিলা প্ৰস্তুত কৰাৰ লগতে উৰুৱাবলৈও ভাল পায় ।
ব্যৱসায়ী অংকুৰ জৈনে কয় যে, তেওঁ কিছু ব্যতিক্ৰম কৰিব বিচাৰিছিল । সেই উদ্দেশ্যেৰে তেওঁ এই চিলাখন প্ৰস্তুত কৰিছে (Meerut Saraf Businessman made gold kite)। তেওঁ লগতে কয় যে সচৰাচৰ বজাৰত যথেষ্ট পৰিমাণৰ চীনা মাঞ্জা উপলব্ধ । সেয়ে তেওঁ চীনা সামগ্ৰীৰ বিৰোধিতা কৰি সোণৰ মাঞ্জাও প্ৰস্তুত কৰিছে ।
অংকুৰ জৈনে লগতে কয় যে, গণৰাজ্য দিৱস আৰু বসন্ত পঞ্চমী একেদিনাই । এনে পৰিস্থিতিত, আকাশত চিলা উৰাটো নিশ্চিত । সেয়েহে তেওঁ সাংকেতিকভাৱে এই বিশেষ সোণৰ চিলা পৰিয়ালৰ সৈতে উৰুৱাব । তেওঁ উল্লেখ কৰা মতে এই চিলা সোণৰ মাঞ্জা আৰু সোণৰ উঘাৰ সহায়ত উৰিব । জৈনে জনোৱা মতে চিলাটোৰ ওজন ৪০০ গ্ৰামতকৈও অধিক । ২০ মিটাৰ সোণৰ মাঞ্জাও প্ৰস্তুত কৰা হৈছে । সোণৰ উঘাটো দেখুৱাই সাংবাদিকৰ আগত জৈনে কয় যে, শিল্পীসকলে উঘাটো প্ৰস্তুত কৰাৰ ক্ষেত্ৰত অধিক সাৱধানতা অৱলম্বন কৰিব লগা হৈছে ।
অংকুৰ জৈনে লগতে কয় যে তেওঁ এই সোণৰ চিলাৰ জৰিয়তে ইণ্ডিয়া বুক অফ ৰেকৰ্ডছ, এছিয়া বুক অফ ৰেকৰ্ডছকে ধৰি গিনিছ বুক অফ ৰেকৰ্ডছতো নাম পঞ্জীয়ন কৰাৰ দিশে আগবাঢ়িছে । তেওঁৰ আশা সোণৰ এই চিলাৰ জৰিয়তে মীৰাটে এক বিশেষ স্বীকৃতি লাভ কৰিব ।
লগতে পঢ়ক :Subhas Chandra Bose Jayanti 2023: নেতাজীক লৈ কি ক'লে মোহন ভাগৱতে ?
