নিউজ ডেস্ক, 16 জুলাই : উত্তৰ প্ৰদেশৰ চৰাই গুলহাৰিয়া গাওঁ আৰু বালাপাৰ গাঁৱৰ দুখন চৰকাৰী কনিষ্ঠ উচ্চ বিদ্যালয়ত অঘটন ৷ এই দুখন চৰকাৰী কনিষ্ঠ বিদ্যালয়ত অস্বাস্থ্যকৰভাৱে যোগান ধৰা মধ্যাহ্ন ভোজন গ্ৰহণ কৰাৰ পিছতেই অসুস্থ হৈ পৰে প্ৰায় 40 জন শিক্ষাৰ্থী ৷
শনিবাৰে চৰগাৱনত থকা সামূহিক স্বাস্থ্য কেন্দ্ৰত ভৰ্তি কৰোৱা হয় আটাইকেইজন অসুস্থ ছাত্ৰ-ছাত্ৰীক ৷ বৰ্তমান আটাইকেইজন অসুস্থ শিক্ষাৰ্থী বিপদৰ পৰা মুক্ত বুলি জানিব পৰা গৈছে ৷ ইফালে গাঁৱৰ ৰাইজ বিদ্যালয়ত উপস্থিত হৈ ঘটনাৰ বাবে জগৰীয়া লোকসকলক গ্ৰেপ্তাৰ কৰাৰ দাবীত প্ৰতিবাদ সাব্যস্ত কৰে ৷ শিক্ষা বিষয়া ৰমেন্দ্ৰ কুমাৰ সিঙে কয় যে, চৰগাৱন ব্লকৰ 70 খন প্ৰাথমিক আৰু কনিষ্ঠ হাইস্কুলত আউটচ’ৰ্চিং কোম্পানী অক্ষয় পাত্ৰই মধ্যাহ্ন ভোজনৰ যোগান ধৰি আছিল ৷
তেওঁ কয় যে দুয়োখন বিদ্যালয়ৰ 40 গৰাকী ছাত্ৰ-ছাত্ৰী অসুস্থ হোৱাৰ খবৰ পোৱা গৈছে ৷ সিঙে কয় যে জিলাৰ মধ্যাহ্ন ভোজনৰ সমন্বয়ক লগে লগেই উপস্থিত হৈ তদন্ত আৰম্ভ কৰিছে ৷ তদন্তৰ প্ৰতিবেদন আহিলেই দায়ী লোকসকলৰ বিৰুদ্ধে কঠোৰ ব্যৱস্থা গ্ৰহণ কৰা হ’ব ৷ চৰাই গুলহাৰিয়াৰ বিদ্যালয়খনৰ সহকাৰী শিক্ষক সন্তোষ মিশ্ৰই নিশ্চিত কৰে যে বিদ্যালয়ৰ মধ্যাহ্ন ভোজন অক্ষয় পাত্ৰই যোগান ধৰিছিল ৷
