নিউজ ডেস্ক, ১৭ জানুৱাৰী : কেন্দ্ৰীয় গৃহ আৰু নগৰ পৰিক্ৰমা মন্ত্ৰালয়ৰ সূত্ৰই জনোৱা মতে, মঙলবাৰে সম্পত্তি সঞ্চালকালয়ে তৃণমূলৰ প্ৰাক্তন সাংসদ মহুৱা মৈত্ৰক তাৎক্ষণিকভাৱে তেওঁৰ চৰকাৰী বাংলো খালী কৰিবলৈ নিৰ্দেশ দিছে । মহুৱাক ডিচেম্বৰ মাহত লোকসভাৰ পৰা বহিষ্কাৰ কৰা হৈছিল ।
তৃণমূল কংগ্ৰেছৰ নেত্ৰীগৰাকীক সাংসদ হিচাপে আৱণ্টন কৰা বাংলোটো তৎক্ষণাৎ খালী কৰিবলৈ কোৱা হৈছে । গৃহ আৰু নগৰ পৰিক্ৰমা মন্ত্ৰালয়ে কয় ।
উল্লেখ্য যে মহুৱা মৈত্ৰক 'অনৈতিক আচৰণ'ৰ বাবে দোষী সাব্যস্ত কৰা হৈছিল আৰু ব্যৱসায়ী দৰ্শন হিৰানন্দনীৰ পৰা উপহাৰ গ্ৰহণ আৰু তেওঁৰ ইউজাৰ আইডি আৰু পাছৱ'ৰ্ড তেওঁক প্ৰদান কৰাৰ অভিযোগত যোৱা বছৰ ৮ ডিচেম্বৰত নিম্ন সদনৰ পৰা বহিষ্কাৰ কৰা হয় ।
"যিহেতু মঙলবাৰে তেওঁক (মহুৱা মৈত্ৰ) উচ্ছেদৰ জাননী জাৰি কৰা হৈছে, এতিয়া তেওঁ চৰকাৰী বাংলোটো অতি সোনকালে খালী কৰাটো নিশ্চিত কৰিবলৈ সম্পত্তি সঞ্চালকালয়ৰ বিষয়াসকলৰ এটা দল প্ৰেৰণ কৰা হ'ব ।" এক সূত্ৰই সংবাদ সংস্থা পিটিআইক জনায় ।
যোৱা বছৰ ৮ ডিচেম্বৰত লোকসভাৰ পৰা বহিষ্কাৰ কৰা তৃণমূল নেত্ৰীগৰাকীক পূৰ্বতে তেওঁৰ বাংলো আৱণ্টন বাতিল হোৱাৰ পিছত ৭ জানুৱাৰীৰ ভিতৰত ঘৰটো খালী কৰিবলৈ কোৱা হৈছিল ।
আনহাতে, জানুৱাৰীৰ 8 তাৰিখে ডিঅ'ইয়ে তিনি দিনৰ ভিতৰত তেওঁৰ পৰা উত্তৰ বিচাৰি এখন জাননী জাৰি কৰিছিল । জাননীখনত তেওঁ কিয় তেওঁৰ চৰকাৰী আৱাস খালী কৰা নাই তাৰ কাৰণ দৰ্শাবলৈ নিৰ্দেশ দিয়া হৈছিল । ইয়াৰ পিছত ১২ জানুৱাৰীত তেওঁক আন এখন জাননী জাৰি কৰা হয় ।
উল্লেখ্য যে 4 জানুৱাৰীত দিল্লী উচ্চ ন্যায়ালয়ে তৃণমূল নেত্ৰীগৰাকীক তেওঁক আৱণ্টন কৰা চৰকাৰী আৱাসত থাকিবলৈ অনুমতি দিবলৈ অনুৰোধ কৰি ডিঅ'ইৰ কাষ চাপিবলৈ কয় ।
ন্যায়াধীশ সুব্ৰমণিয়ম প্ৰসাদে ৭ জানুৱাৰীৰ ভিতৰত চৰকাৰী বাংলো খালী কৰিবলৈ কোৱা এক চৰকাৰী আদেশক মহুৱাই জনোৱা প্ৰত্যাহ্বানৰ আবেদন সন্দৰ্ভত উল্লেখ কৰে যে সংশ্লিষ্ট নিয়মসমূহে কিছু ব্যতিক্ৰমী পৰিস্থিতিত মাচুলৰ বিনিময়ত কৰ্তৃপক্ষক এগৰাকী বাসিন্দাক ছয় মাহলৈকে থাকিবলৈ অনুমতি দিয়ে ।