নিউজ ডেস্ক , ২৯ জানুৱাৰী : বিহাৰৰ প্ৰাক্তন মুখ্য়মন্ত্ৰী লালু প্ৰসাদ যাদৱৰ শুভাকাংশীৰ বাবে এক ভাল খবৰ । ক্ৰমাৎ সুস্থ হৈছে নেতাগৰাকী । এইমছত চিকিৎসাধীন নেতাগৰাকী পূৰ্বতকৈ কিছু সুস্থ হোৱাৰ লগে লগে বৃহস্পতিবাৰে কাৰ্ডিয়াক ইনটেনছিভ কেয়াৰ ইউনিট (চিআইচিইউ)ৰ পৰা এটা ব্যক্তিগত ৱাৰ্ডলৈ স্থানান্তৰ কৰা হৈছে । নেতাগৰাকীক চিকিৎসা প্ৰদান কৰা চিকিৎসকৰ দলটোৰ এগৰাকী জ্য়েষ্ঠ চিকিৎসকে জনোৱা মতে পূৰ্বতকৈ নেতা গৰাকীৰ স্বাস্থ্য় উন্নত হৈছে আৰু উশাহ লোৱাটো এতিয়া অসুবিধা পোৱা নাই নেতাগৰাকীয়ে ।
উল্লেখ যে প্ৰাক্তন মুখ্য়মন্ত্ৰী গৰাকীক এইমছৰ হৃদৰোগ বিশেষজ্ঞ ড০ ৰাকেশ যাদৱৰ তত্বাৱধানত চিকিৎসালয়ৰ চিআইচিইউত ৰখা হৈছিল । তেওঁক ইয়াৰ পূৰ্বেও চিকিৎসা প্ৰদান কৰিছিল ড০ ৰাকেশ যাদৱে । ড০ যাদৱে কোৱা মতে নেতাজনে লাহে লাহে নিউম'নিয়া সংক্ৰমণৰ পৰা আৰোগ্য হৈছে যিয়ে তেওঁৰ হাঁওফাঁও সংক্ৰমিত কৰিছিল । নিউম'নিয়া সংক্ৰমণৰ ফলত তেওঁ পালমোনাৰী এডিমা ৰোগত আক্ৰান্ত হৈছিল ।
৭২ বছৰীয়া আৰজেডি সভাপতি গৰাকীক শনিবাৰে এইমছত ভৰ্তি কৰোৱা হৈছিল । ৰাঁচীৰ ৰাজেন্দ্ৰ চিকিৎসা বিজ্ঞান প্ৰতিষ্ঠানত চিকিৎসা চলি থকা অৱস্থাত স্বাস্থ্যৰ অৱনতি হোৱাৰ পিছত তেওঁক চাৰ্টাৰ্ড বিমানৰ জৰিয়তে এয়াৰ এম্বুলেঞ্চেৰে দিল্লীলৈ অনা হৈছিল ।
লগতে পঢ়ক :ক'ভিড মহামাৰীৰ সময়ত চৰকাৰ ভূমিকা উল্লেখনীয়: ৰাষ্ট্ৰপতি
