নেশ্যনেল ডেস্ক, 13 আগষ্ট : দক্ষিণ কাশ্মীৰৰ কুলগাম জিলাত বৃহস্পতিবাৰে সুৰক্ষা বাহিনী আৰু সন্ত্ৰাসবাদীৰ মাজত পুনৰ গুলিয়াগুলীৰ ঘটনা সংঘটিত হয় ৷ এই গুলিয়াগুলীত দুজন সেনা জোৱানৰ লগতে দুজন সাধাৰণ লোক গুৰুতৰভাৱে আহত হয় ৷ এই সন্দৰ্ভত কাশ্মীৰৰ আৰক্ষী মহাপৰিদৰ্শক বিজয় কুমাৰে কয়, "অনন্তনাগৰ চাহিল য়াকুব ভাট আৰু কুলগামৰ শ্বাহিদ ফাৰুক শ্বেখ গুলিবিদ্ধ হৈছে ৷ লগতে এজন চি আৰ পি এফ জোৱান আৰু এজন সেনা জোৱানে এই সংঘৰ্ষত আহত হৈছে ৷ দুয়োগৰাকী সেনা জোৱান সংকটমুক্ত যদিও চাহিল য়াকুক ভাটৰ অৱস্থা এতিয়াও সংকটজনক বুলি জানিব পৰা গৈছে ৷"
তেওঁ লগতে কয়, বৃহস্পতিবাৰে কুলগামৰ মীৰ বাজাৰ অঞ্চলৰ মাজেৰে গৈ থকা অৱস্থাতে সীমান্ত সুৰক্ষা বাহিনীৰ বাহনলৈ লক্ষ্য কৰি সন্দেহজনক লস্কৰে-ই-তৈবাৰ সদস্যই গুলিবৰ্ষণ কৰে ৷ সেনাই এই গুলিবৰ্ষণৰ প্ৰত্যুত্তৰত ওলটাই গুলিবৰ্ষণ কৰে যাৰ বাবে চাৰিমহলীয়া ঘৰটোতে আবদ্ধ হৈ পৰে সন্ত্ৰাসবাদী সদস্যকেইজন ৷ ইয়াৰ পিছতে দুয়ো পক্ষৰ মাজত কিছু সময় ধৰি গুলিয়াগুলী অব্যাহত থাকে ৷
