নেশ্যনেল ডেস্ক, ১০ ছেপ্টেম্বৰ : মহাকাশৰ পৰা আহিছে এটা ভাল খবৰ ৷ সূৰ্য অধ্যয়নৰ বাবে ভাৰতৰ পঠিওৱা প্ৰথম মহাকাশ ভিত্তিক অভিযান আদিত্য L১ মহাকাশযানে দেওবাৰে পুৱতি নিশা তৃতীয়টো পৃথিৱীমুখী কৌশল বা পৃথিৱী-বাউণ্ড মেনুৱেৰ সফলতাৰে সম্পন্ন কৰে ৷ এই কথা সদৰী কৰিছে ভাৰতীয় মহাকাশ গৱেষণা কেন্দ্ৰ চমুকৈ ISRO এ ৷ ISRO এ উল্লেখ কৰা মতে, মহাকাশ সংস্থাটোৰ টেলিমেট্ৰি, ট্ৰেকিং এণ্ড কমাণ্ড নেটৱৰ্ক (Telemetry, Tracking and Command Network চমুকৈ ISTRAC) য়ে চলাইছিল এই অভিযানটো ।
তৃতীয়টো পৃথিৱী-বাউণ্ড মেনুৱেৰ ( third Earth-bound manoeuvre অৰ্থাৎ EBN#৩) বেংগালুৰুৰ ISTRAC ৰ পৰা সফলতাৰে সম্পন্ন কৰা হয় । এই অভিযানৰ সময়ত মৰিচাছ, বেংগালুৰু, এছডিএছচি-শ্বাৰ আৰু প’ৰ্ট ব্লেয়াৰত থকা ISRO ৰ গ্ৰাউণ্ড ষ্টেচনে উপগ্ৰহটোক অনুসৰণ কৰিছিল । ভাৰতীয় মহাকাশ গৱেষণা সংস্থা (ISRO) এ X ত টুইট কৰি এইদৰে কয় ।
ISRO এ X ৰ টুইটত উল্লেখ কৰা অনুসৰি, আদিত্য L১ মহাকাশযানে নতুন কক্ষপথ লাভ কৰিছে, যি ২৯৬ কিলোমিটাৰ x ৭১৭৬৭ কিলোমিটাৰ আৰু পৰৱৰ্তী পৃথিৱী-বাউণ্ড মেনুৱেৰ হ’ব ১৫ ছেপ্টেম্বৰত, পুৱা প্ৰায় ২ বজাত । ইতিমধ্যে সকলোৰে জ্ঞাত যে, আদিত্য L১ হৈছে প্ৰথমটো ভাৰতীয় মহাকাশভিত্তিক মানৱ নিৰীক্ষণ কেন্দ্ৰ, যি পৃথিৱীৰ পৰা প্ৰায় ১৫ লাখ কিলোমিটাৰ দূৰত্বত অৱস্থিত প্ৰথম সূৰ্য-পৃথিৱী লেগ্ৰেঞ্জিয়ান বিন্দু (L১)ৰ চাৰিওফালে থকা প্ৰভা কক্ষপথৰ পৰা সূৰ্যক অধ্যয়ন কৰিব ।
প্ৰথম আৰু দ্বিতীয়টো পৃথিৱী-বাউণ্ড মেনুৱেৰ ক্ৰমে ৩ আৰু ৫ ছেপ্টেম্বৰত সফলতাৰে সম্পন্ন কৰা হয় । মহাকাশযানখনক লেগ্ৰেঞ্জিয়ান বিন্দু L১ ৰ ফালে স্থানান্তৰ কক্ষপথত ৰখাৰ পূৰ্বে আৰু এটা পৃথিৱীমুখী কক্ষপথৰ কৌশল অথবা পৃথিৱী-বাউণ্ড মেনুৱেৰ সম্পন্ন কৰা হ’ব । মহাকাশযানখনে পৃথিৱীৰ চাৰিওফালে ১৬ দিনীয়া যাত্ৰাৰ সময়ত এই কৌশলসমূহ সম্পন্ন কৰিব লাগিব, য’ত ই L১ লৈ আগবাঢ়ি যোৱাৰ বাবে প্ৰয়োজনীয় বেগ লাভ কৰিব ।
ISRO ৰ মেৰু উপগ্ৰহ উৎক্ষেপণ বাহন (Polar Satellite Launch Vehicle চমুকৈ PSLV-C৫৭)য়ে ২ ছেপ্টেম্বৰত শ্ৰীহৰিকোটাৰ সতীশ ধৱন মহাকাশ কেন্দ্ৰৰ দ্বিতীয় উৎক্ষেপণ পেডৰ পৰা আদিত্য L১ সফলতাৰে উৎক্ষেপণ কৰিছিল ।
লগতে পঢ়ক : ISRO Aditya L1 Mission : শ্ৰীহৰিকোটাৰ পৰা আদিত্য এল১ৰ সফল উৎক্ষেপণ
