নেশ্যনেল ডেস্ক, ৩০ জুলাই: আন্তঃৰাষ্ট্ৰীয় বিমান পৰিবহণ স্থগিতকৰণৰ সময়সীমা পুনৰ এমাহ বৃদ্ধি কৰিলে ভাৰত চৰকাৰে । বৰ্তমান ক'ভিড পৰিস্থিতিৰ প্ৰতি লক্ষ্য ৰাখি ভাৰতলৈ আন দেশৰ পৰা বিমান অহা আৰু ভাৰতৰ পৰা বিদেশলৈ যোৱাৰ ক্ষেত্ৰত জাৰি কৰা নিষেধাজ্ঞা বাহাল ৰখা হৈছে । শুকুৰবাৰে অসামৰিক বিমান পৰিবহনৰ বিমান নিয়ন্ত্ৰক সঞ্চালকালয়ে প্ৰকাশ কৰা এক বিবৃতি অনুসৰি, আন্তঃৰাষ্ট্ৰীয় বিমান পৰিবহণ স্থগিতকৰণৰ সময়সীমা ৩১ আগষ্টলৈ বৃদ্ধি কৰা হৈছে । ২৬ জুনত সঞ্চালকালয়ে জাৰি কৰা বিজ্ঞপ্তিৰ আংশিক সংশোধন ঘটাই আন্তঃৰাষ্ট্ৰীয় যাত্ৰীবাহী বিমান সেৱাৰ ক্ষেত্ৰত বাধা আৰোপ কৰা হৈছে ।
পূৰ্বে আন্তঃৰাষ্ট্ৰীয় বিমান পৰিবহণ ৩১ জুলাইলৈকে স্থগিত ৰখাৰ নিৰ্দেশ জাৰি কৰা হৈছিল । অৱশ্যে, এই নিষেধাজ্ঞা আন্তঃৰাষ্ট্ৰীয় কাৰ্গো বিমান আৰু ডিজিচিএৰ দ্বাৰা বিশেষভাৱে অনুমোদিত বিমানৰ ক্ষেত্ৰত প্ৰযোজ্য নহয় বুলি বিজ্ঞপ্তিটোত স্পষ্টকৈ উল্লেখ কৰা হৈছে । উল্লেখ্য যে, ইতিমধ্যে বিশ্বৰ কেইবাখনো দেশত ক'ভিড-১৯ৰ তৃতীয় ঢৌৰ সংক্ৰমণ আৰম্ভ হৈছে । ভাৰততো তৃতীয় ঢৌৰ সংক্ৰমণ হোৱাৰ আশংকাতে আন্তঃৰাষ্ট্ৰীয় বিমান পৰিবহণ স্থগিত ৰখা হৈছে ।
