নেশ্যনেল ডেস্ক, ২৬ নৱেম্বৰ : ভাৰতৰ কৌশলগত স্থিতিয়ে গঠনমূলকভাৱে বিভিন্ন শক্তি খণ্ডৰ সৈতে জড়িত হ'বলৈ সক্ষম হৈছে । জটিল কূটনৈতিক সম্পৰ্ক গঢ়ি তোলাৰ সামৰ্থই দেশখনক আন্তঃৰাষ্ট্ৰীয় সংঘাতৰ সম্ভাৱ্য মধ্যস্থতাকাৰী হিচাপে প্ৰদৰ্শন কৰে । এই মন্তব্য ৰাষ্ট্ৰসংঘৰ ভাৰতৰ স্থায়ী প্ৰতিনিধি ৰুচিৰা কম্বোজৰ ।
ৰাষ্ট্ৰসংঘৰ ৰাষ্ট্ৰদূত ৰুচিৰা কম্বোজে কয় যে দ্ৰুত পৰিৱৰ্তন আৰু জটিল প্ৰত্যাহ্বানৰ যুগত ভাৰত কেৱল অপৰিসীম বৈচিত্ৰ্য আৰু সাংস্কৃতিক সমৃদ্ধিৰ ৰাষ্ট্ৰ হিচাপেই নহয়, আন্তঃৰাষ্ট্ৰীয় মঞ্চত এক গুৰুত্বপূৰ্ণ ৰাষ্ট্ৰ হিচাপেও আত্মপ্ৰকাশ কৰিছে । কম্বোজৰ মতে ভাৰতে সহযোগিতা, শান্তি আৰু পাৰস্পৰিক সন্মানৰ নীতিক পুনৰুজ্জীৱিত কৰিছে ।
কম্বোজে যোৱা সপ্তাহত কলম্বিয়া বিশ্ববিদ্যালয়ৰ স্কুল অৱ ইণ্টাৰনেচনেল এণ্ড পাব্লিক এফেয়াৰ্ছত আয়োজিত 'ইণ্ডিয়া ইন দ্যা ইমাৰ্জিং গ্লোবেল অৰ্ডাৰ' শীৰ্ষক এক বিশেষ অনুষ্ঠানত ভাষণ প্ৰদান কৰে । ভাষণ প্ৰসংগত কম্বোজে কয় যে ভাৰতে বিশ্বৰ মধ্যস্থতাকাৰী আৰু মীমাংসাকাৰী হিচাপে দেশখনক প্ৰতিষ্ঠা কৰিবলৈ সক্ষম হৈছে ।
তেওঁৰ মতে, শেহতীয়া বছৰবোৰত আন্তৰ্জাতিক সম্প্ৰদায়ে বিভিন্ন ৰাষ্ট্ৰত আলোচনা আৰু বুজাবুজি বৃদ্ধিৰ ক্ষেত্ৰত ভাৰতৰ সক্ৰিয় দৃষ্টিভংগী প্ৰত্যক্ষ কৰিছে । তদুপৰি, ভাৰতে বন্ধুত্বপূৰ্ণ ইতিহাসৰ সৈতে কৌশলগত স্থিতিৰ জৰিয়তে বিভিন্ন শক্তি খণ্ডৰ সৈতে গঠনমূলকভাৱে জড়িত হ'বলৈ সক্ষম হৈছে বুলিও তেওঁ উল্লেখ কৰে ।
কম্বোজৰ মতে ভাৰতে দেখুৱাইছে যে ভিন্ন মতাদৰ্শ আৰু শাসনৰ আৰ্হি থকা দেশসমূহৰ সৈতে বন্ধুত্বপূৰ্ণ সম্পৰ্ক কেনেকৈ বজাই ৰাখিব লাগে । জটিল কূটনৈতিক বন্ধুত্ব গঢ়ি তোলাৰ এই সামৰ্থ্যই ভাৰতক আন্তঃৰাষ্ট্ৰীয় সংঘাতৰ এক সম্ভাৱ্য মধ্যস্থতাকাৰী হিচাপে প্ৰদৰ্শন কৰে বুলিও ভাষণ প্ৰসংগত উল্লেখ কৰে কম্বোজে ।
উল্লেখ্য যে, এই সন্মিলনত বিশেষজ্ঞ, শিক্ষাৰ্থী, অৰ্থনীতিবিদ আৰু শিক্ষাবিদসকলে অংশগ্ৰহণ কৰে । কম্বোজে লগতে কয় যে ছেপ্টেম্বৰত দিল্লীত অনুষ্ঠিত জি-২০ সন্মিলন আৰু নতুন দিল্লী নেতাৰ ঘোষণাপত্ৰৰ সৰ্বসন্মত অনুমোদনে দেশৰ এক জটিল ভূ-ৰাজনৈতিক দৃশ্যপট প্ৰস্তুত কৰাৰ সামৰ্থ প্ৰদৰ্শন কৰে ।
সম্প্ৰতি সমগ্ৰ বিশ্বতে বিভিন্ন ধৰণৰ প্ৰত্যাহ্বান আছে । শেহতীয়া ইজৰাইল-হামাছ সংঘৰ্ষ আৰু দীৰ্ঘদিনীয়া ইউক্ৰেইন যুদ্ধৰ ফলত ৰাষ্ট্ৰসংঘৰ নিৰাপত্তা পৰিষদৰ দৰে গোলকীয় সংস্থাসমূহ ব্যাপক প্ৰত্যাহ্বানৰ মোকাবিলা কৰাত বিফল হৈছে । এনে এক পৰিস্থিতিৰ মাজতে ৰুচিৰা কম্বোজৰ এই মন্তব্যই ব্যাপক প্ৰতিক্ৰিয়াৰ সৃষ্টি কৰিছে ।
কলম্বিয়া বিশ্ববিদ্যালয়ৰ অধ্যাপক তথা নীতি আয়োগৰ প্ৰাক্তন উপাধ্যক্ষ অৰবিন্দ পানাগাৰিয়াই তেওঁৰ মন্তব্যত ভাৰতৰ বিকাশৰ গতিপথ আৰু শীঘ্ৰেই বিশ্বৰ তৃতীয় সৰ্ববৃহৎ অৰ্থনীতি হোৱাৰ সম্ভাৱনাৰ ওপৰত আলোকপাত কৰে । তেওঁ উল্লেখ কৰে যে ২০১৪ চনত ভাৰত হৈছে বিশ্বৰ দশম বৃহত্তম অৰ্থনীতি আৰু যোৱা দশকত ই ৫ম সৰ্ববৃহৎ অৰ্থীনীতিলৈ উন্নীত হৈছে ।
কিন্তু এয়া অহা ৩ বছৰৰ ভিতৰত সলনি হ'ব । ২০২৬ চনৰ শেষৰ ফালে ভাৰত বিশ্বৰ তৃতীয় সৰ্ববৃহৎ অৰ্থনীতি হিচাপে পৰিগণিত হ'ব বুলিও তেওঁ উল্লেখ কৰে । তেওঁ কয় যে ২০২২ চনলৈকে জাপান তৃতীয় সৰ্ববৃহৎ অৰ্থনীতি আছিল যাৰ জিডিপি ৪.২ ট্ৰিলিয়ন আমেৰিকান ডলাৰ আৰু জাৰ্মানী হৈছে ৪.১ ট্ৰিলিয়ন আমেৰিকান ডলাৰৰ জিডিপিৰ সৈতে চতুৰ্থ সৰ্ববৃহৎ অৰ্থনীতি । পানাগাৰিয়াই কয় যে ২০২৩ চনত জাপানৰ জিডিপি হ্ৰাস হোৱাৰ সম্ভাৱনা আছে আৰু ২০২৬ চনৰ শেষত জাৰ্মানীৰ জিডিপি সৰ্বাধিক ৪.৯৫ ট্ৰিলিয়ন আমেৰিকান ডলাৰ হ'ব ।
লগতে পঢ়ক : নতুন দিল্লীত স্থায়ীভাৱে বন্ধ হ'ল আফগানিস্তানৰ দূতাবাস
