নিউজ ডেস্ক, ২০ জানুৱাৰী : ভাৰতে বৃহস্পতিবাৰে ব্ৰহ্মোচ ছুপাৰ ছ’নিক ক্ষেপণাস্ত্ৰৰ এক নতুন সংস্কৰণৰ সফল পৰীক্ষণ সম্পূৰ্ণ কৰে । ওড়িশাৰ বালাচোৰৰ উপকূলৰ পাৰত কৰা হৈছিল এই পৰীক্ষা (India successfully test fires new version of Brahmos Super Sonic missile) ৷
প্ৰতিৰক্ষা বিভাগৰ এক সূত্ৰই এই বিষয়ে সদৰি কৰা অনুসৰি, ব্ৰহ্মোচ মিছাইলৰ এই নতুন সংস্কৰণত যথেষ্ট প্ৰযুক্তিগত উন্নয়ন কৰা হৈছে ৷ যাৰ গুণগত মান আৰু কাৰ্যকাৰিতা এই শেহতীয়া পৰীক্ষণৰ দ্বাৰা সফলভাৱে প্ৰমাণ কৰিব পৰা গৈছে ।
যোৱা সপ্তাহত ভাৰতীয় নৌ সেনাৰ যুদ্ধ জাহাজ আই এন এচ বিশাখাপট্টনমৰ পৰা এই ব্ৰহ্মোচ ছুপাৰ ছ’নিক মিছাইলৰ সফল সম্পৰীক্ষণ কৰা হৈছিল । "উন্নত মানৰ এই ব্ৰহ্মোচ ছুপাৰ ছ’নিক মিছাইলৰ চি টু চি ভেৰিয়েণ্টৰ পৰীক্ষণ সম্পূৰ্ণ হ’ল । এই মিছাইলে সঠিকভাৱে নিজৰ লক্ষ্যত আঘাত হানিব পাৰিছে । DRDO ৰ এক বিশেষজ্ঞই এই বুলি জনায় ।
মন কৰিবলগীয়া যে, এই ব্ৰহ্মোচ ক্ষেপনাস্ত্ৰসমূহ হ’ল ভাৰতীয় নৌ সেনাৰ যুদ্ধ জাহাজ সমূহৰ প্ৰধান অস্ত্ৰ আৰু এই ক্ষেপনাস্ত্ৰসমূহ নৌ সেনাৰ সকলো ঘাটিতেই ইতিমধ্যেই স্থাপন কৰা হৈছে । এই ক্ষেপনাস্ত্ৰৰ পানীৰ তলত ব্যৱহাৰ কৰিব পৰা এক সংস্কৰণৰ ওপৰতো কাম চলি আছে ৷ ইয়াৰ সফল সম্পৰীক্ষণৰ পাছত ভাৰতৰ বাহিৰেও দেশৰ বন্ধু ৰাষ্ট্ৰসমূহলৈও বিক্ৰী তথা ৰপ্তানিৰ পৰিকল্পনাৰ কথা ভবা হৈছে বুলি প্ৰতিৰক্ষা বিভাগৰ সূত্ৰই জনাইছে ।
লগতে চাওক: এইবাৰ গণৰাজ্য দিৱসৰ পেৰেডত নাথাকিব অসমৰ প্রতীকপট !
