নেশ্যনেল ডেস্ক,13 ডিচেম্বৰঃ শনিবাৰে প্ৰধানমন্ত্ৰী নৰেন্দ্ৰ মোদীয়ে কয় যে, ভাৰতে কেৱল পেৰিছ চুক্তিৰ লক্ষ্যসমূহত উপনীত হোৱাই নহয় এই চুক্তিক অকল্পনীয়ভাৱে পাৰ কৰিবলৈয়ো সক্ষম হ’ব ৷ লেণ্ডমাৰ্ক পেৰিছ চুক্তিৰ পঞ্চম বৰ্ষপুৰ্তি উপলক্ষে অনুষ্ঠিত জলবায়ু উচ্চাকংক্ষা সন্মিলন সম্বোধন কৰি প্ৰধানমন্ত্ৰী গৰাকীয়ে কয়,"ভাৰতে ইয়াৰ প্ৰদূষণ নিৰ্গমনৰ পৰিমাণ 21 শতাংশলৈ হ্ৰাস কৰিবলৈ সক্ষম হৈছে ৷ আমাৰ সৌৰ ক্ষমতা যি 2014 চনত 2.63 গিগাৱাটৰ আছিল 2020 চনত ই হয়গৈ 36 গিগাৱাট ৷ আনহাতে, আমাৰ নৱীকৰণযোগ্য শক্তিৰ ক্ষমতা বিশ্বৰ ভিতৰত চতুৰ্থ ৷"
তেখেতে আৰু কয়, ভাৰতৰ সৌৰ ক্ষমতা 2022 চনৰ পূৰ্বে 175 গিগাৱাটত উপনীত হ’ব ৷ ইয়াৰ উপৰিও আমাৰ হাতত আৰু অধিক উচ্চাকাংক্ষী লক্ষ্য আছে ভাৰতৰ নৱীকৰণযোগ্য শক্তি ক্ষমতা 450 গিগাৱাটলৈ বৃদ্ধি কৰা ৷ আমি ভাৰতৰ বনাঞ্চল বৃদ্ধি আৰু ইয়াৰ জৈৱ বৈচিত্ৰক সুৰক্ষা প্ৰদান কৰিবলৈ সক্ষম হৈছো ৷
বিশ্ব মানচিত্ৰত ভাৰতে দুটা প্ৰধান পদক্ষেপ গ্ৰহণ কৰিছে-The International Solar Alliance আৰু Coalition for Disaster Resilient Infrastructure ৷ এই সন্দৰ্ভত ইটিভি ভৰতৰ সৈতে সাক্ষাৎকাৰত JNUৰ Centre for East Asian Studiesৰ অধ্যাপক শ্ৰীকান্ত কোন্দাপাল্লীয়ে কয়, প্ৰথম অৱস্থাত ভাৰত আৰু BASIC (Brazil, South Africa India and China) ই উন্নত আৰু উন্নয়নশীল ৰাষ্ট্ৰসমূহৰ মাজত ‘সমান কিন্তু দায়িত্বৰ বিভিন্নতা’ৰ ওপৰত এটি প্ৰস্তাৱ উত্থাপন কৰে ৷ এই প্ৰস্তাৱ যৌথ হোৱাৰ লগতে কিয়োটো প্ৰট’কলৰ দ্বাৰা পৰামৰ্শ প্ৰদান কৰা হ’ব লাগিব ৷ দ্বিতীয়তে, প্ৰদূষণ নিয়ন্ত্ৰণৰ বাবে উন্নত আৰু উন্নয়নশীল দেশসমূহে প্ৰযুক্তি ভগাই লোৱা প্ৰয়োজন ৷
এই সন্মিলনখন মাৰ্কিন যুক্তৰাষ্ট্ৰ, ইংলেণ্ড, ফ্ৰান্স, চিলি আৰু ইটালীয়ে যৌথভাৱে অনুষ্ঠিত কৰে ৷ যিহেতু বিশ্বই COP26ৰ দিশে খোজ আগবঢ়াইছে তেনে ক্ষেত্ৰত এই সন্মিলনখনে COP26ৰ দিশে আৰু এখোজ আগুৱাই যোৱাৰ যৌথ প্ৰচেষ্টাত সহায়ক হ’ব ৷ এই সন্মিলনখনে প্ৰতিখন ৰাষ্ট্ৰৰে নেতা সকলক পেৰিছ চুক্তিৰ অধীনত নতুন উচ্চকাংক্ষী নতুন প্ৰতিশ্ৰুতিসমূহ দাঙি ধৰিবলৈ এখন মঞ্চ প্ৰদান কৰিব ৷
উল্লেখ্য যে, কেন্দ্ৰীয় পৰিৱেশ মন্ত্ৰী প্ৰকাশ জাভেদকাৰে কয় যে, জলবায়ু পৰিৱৰ্তন এদিনতে সৃষ্টি হোৱা সমস্যা নহয় ৷ বিগত 100 বছৰৰ পৰিৱৰ্তনৰ ফলত বৰ্তমান সময়ত ই আৰু অধিক গুৰুতৰ হৈ পৰিছে ৷ তেখেতে কয় যে, ভাৰত এই ক্ষেত্ৰত আমেৰিকা, ইউৰোপ আৰু চীনতকৈ অধিক উন্নত ৷ ভাৰতে মুঠ নিৰ্গমনৰ 3 শতাংশহে প্ৰদূষণৰ সৃষ্টি কৰে ৷ ইয়াৰ বিপৰীতে আমেৰিকাই 25 শতাংশ, ইউৰোপে 22 শতাংশ আৰু চীনে 13 শতাংশ প্ৰদূষণৰ সৃষ্টি কৰে ৷ আমি জলবায়ু পৰিৱৰ্তনৰ ক্ষেত্ৰত যদিও দায়ী নহয় কিন্তু এখন দায়িত্বশীল ৰাষ্ট্ৰ হিচাপে আমি এই বৈশ্বিক সমস্যাটো সমাধানৰ বাবে অন্য ৰাষ্ট্ৰসমূহৰ সৈতে মিত্ৰতা কৰিছো বুলিও কয় প্ৰকাশ জাৱেদকাৰে ৷
সমান্তৰালকৈ শনিবাৰে পেৰিচ চুক্তিত পুনৰ অন্তৰ্ভূক্ত হোৱাৰ বাবে শপত গ্ৰহণ কৰে মাৰ্কিন ৰাষ্ট্ৰপতি জ’ বাইডেনে ৷ চলিত বৰ্ষৰ 4 নৱেম্বৰত ভূতপূৰ্ব মাৰ্কিন ৰাষ্ট্ৰপতি ড’নাল্ড ট্ৰাম্পৰ আহ্বান মৰ্মে আমেৰিকাই এই চুক্তিৰ পৰা নিজৰ নাম কৰ্তন কৰিছিল ৷
লগতে পঢ়ক-টিআৰপি সংক্ৰান্তীয় গোচৰত গ্ৰেপ্তাৰ ৰিপাব্লিকৰ চিইঅ'
