নিউজ ডেস্ক, ১৮ আগষ্ট : চলিত বছৰৰ বৰ্ষা ঋতুৱে হিমাচল প্ৰদেশত ধ্বংসযজ্ঞ চলাইছে । বানপানী, ধাৰাসাৰ বৰষুণ আৰু ভূমিস্খলনৰ ফলত ৰাজ্যখনত প্ৰায় ৮০০০ কোটি টকাৰ লোকচান হৈছে । আনহাতে, এই দুৰ্যোগত ৩৩০ জন লোকে প্ৰাণ হেৰুৱাইছে । এনে পৰিস্থিতিত হিমাচলত জীৱন-যাত্ৰা পুনৰ স্বাভাৱিক পথলৈ ঘূৰাই আনিবলৈ ৰাজ্য চৰকাৰে কেন্দ্ৰক এই ঘটনাক ৰাষ্ট্ৰীয় দুৰ্যোগ বুলি ঘোষণা কৰিবলৈ দাবী জনাইছে । কিন্তু কেন্দ্ৰই এতিয়ালৈকে এই সমস্যাক ৰাষ্ট্ৰীয় দুৰ্যোগ হিচাপে ঘোষণা কৰা নাই । আনহাতে, ৰাজ্যখনত সংঘটিত ধ্বংসযজ্ঞৰ পৰিপ্ৰেক্ষিতত সুখু চৰকাৰে ইয়াক ৰাজ্যিক দুৰ্যোগ হিচাপে ঘোষণা কৰাৰ সিদ্ধান্ত লৈছে ।
মুখ্যমন্ত্ৰী সুখবিন্দৰ সিং সুখুৱে কয় যে এই সন্দৰ্ভত এখন জাননী জাৰি কৰা হ'ব । তেওঁ কয়, কেন্দ্ৰীয় চৰকাৰৰ তৰফৰ পৰা হিমাচলৰ দুৰ্যোগক ৰাষ্ট্ৰীয় দুৰ্যোগ হিচাপে ঘোষণা কৰাৰ বাবে আমি অপেক্ষা কৰি আছোঁ । ৰাজ্যখনত সাহায্য আৰু উদ্ধাৰ অভিযান অব্যাহত আছে । ৰাজ্য চৰকাৰে ক্ষতিগ্ৰস্ত লোকসকলক নিজস্ব সম্পদৰ পৰা সম্ভৱপৰ সকলো সহায় আগবঢ়াবলৈ চেষ্টা কৰি আছে ।
চৰকাৰে বিশেষকৈ দুৰ্যোগত গৃহহীন হোৱাসকলক সহায় কৰি আছে । সুখুৱে কয় যে বিগত দিনবোৰত কেন্দ্ৰীয় দলে হিমাচল দুৰ্যোগৰ ফলত হোৱা ক্ষতিৰ মূল্যাঙ্কন কৰিবলৈ ক্ষতিগ্ৰস্ত অঞ্চলবোৰ পৰিদৰ্শন কৰে । আমাক কেন্দ্ৰৰ পৰা সময়মতে সহায়ৰ প্ৰয়োজন । এই দুৰ্যোগত ৰাজ্যখনে প্ৰায় ১০,০০০ কোটি টকাৰ লোকচানৰ সন্মুখীন হৈছে ।
