নেশ্যনেল ডেস্ক, ৭ অক্টোবৰ: নাৰ্ক'টিক্স কন্ট্ৰল ব্যুৰ'ই মুম্বাইৰ ক্ৰুজত চলা ড্ৰাগছ পাৰ্টী গোচৰ সন্দৰ্ভত তদন্ত প্ৰক্ৰিয়া আগবঢ়াই নিয়াৰ লগে লগে বহু লোকে জেৰাৰ সন্মুখীন হোৱাৰ সম্ভাৱনা বৃদ্ধি পাইছে । কিয়নো, এতিয়ালৈকে আটক কৰা কৰা অভিযুক্তই নাৰ্ক'টিক্স কন্ট্ৰল ব্যুৰ'(Narcotics Control Bureau)ৰ জেৰাত বহু চাঞ্চল্যকৰ স্বীকাৰোক্তি দিছে । বুধবাৰে তদন্তকাৰী সংস্থাটোৱে এই গোচৰ সন্দৰ্ভত এজন বিদেশী নাগৰিকক গ্ৰেপ্তাৰ কৰে । তদন্তকাৰী বিষয়াই জনোৱা মতে, ক্ৰুজখনৰ পৰা নাৰ্ক'টিক্স কন্ট্ৰল ব্যুৰ'ই আটক কৰা লোকসকলক ড্ৰাগছ যোগান ধৰাৰ অভিযোগ উত্থাপিত হৈছে বিদেশী নাগৰিকজনৰ বিৰুদ্ধে ৷
বৃহস্পতিবাৰে তেওঁক আদালতত হাজিৰ কৰোৱা হ'ব বুলি জানিব পৰা গৈছে । মুম্বাই এনচিবিৰ সঞ্চালক সমীৰ ৱাংখেড়েই জানিবলৈ দিয়ে যে, এই সন্দৰ্ভত বৰ্তমান তদন্ত চলি আছে । বিটকইনৰ সৈতেও এই ঘটনাৰ কিছু সম্পৰ্ক থকাৰ কথা শীঘ্ৰেই পোহৰলৈ আহিব বুলি তেওঁ মন্তব্য কৰে । কিন্তু, এই বিষয়ে তথ্য প্ৰকাশ কৰাৰ পৰা তেওঁ বিৰত থাকে ।
কিয়নো, এতিয়াই এইসমূহ তথ্য ৰাজহুৱা কৰিলে তদন্ত প্ৰক্ৰিয়াত বাধা আহি পৰিব পাৰে ।
এনচিবিৰ দলটোৱে ২ অক্টোবৰত মুম্বাই আন্তঃৰাষ্ট্ৰীয় ক্ৰুজ টাৰ্মিনেল আৰু কৰ্ডেলিয়া ক্ৰুজত অভিযান চলাইছিল । এই অভিযানৰ সময়ত, ক্ৰুজখনৰ পৰা কোকেইন(Cocaine), মেফেড্ৰোন(Mephedrone), হাচিছ(Hashish), হাইড্ৰ'পনিক(Hydroponic) আৰু এমডিএমই(MDME) আদি নিচাজাতীয় দ্ৰব্য জব্দ কৰা হৈছিল । লগতে, নগদ ১.৩৩ লাখ টকাও জব্দ কৰা হৈছিল ।
লগতে পঢ়ক : নাগপুৰৰ ‘বাহুবলী ফুচকা’ৰ নাম শুনিছেনে ?
