নিউজ ডেস্ক, 9 আগষ্ট : জয়পুৰৰ খাছ কোঠী অঞ্চলত অৱস্থিত এখন হোটেলত সন্মতি অবিহনে এগৰাকী 14 বছৰীয়া বিদেশী কিশোৰীৰ ফটো উঠোৱাৰ অভিযোগত অচিনাক্ত ব্যক্তিৰ বিৰুদ্ধে গোচৰ ৰুজু কৰিছে কিশোৰীগৰাকীৰ পৰিয়ালে ৷
বুধবাৰে এই উদ্বেগজনক ঘটনা জয়পুৰ আৰক্ষীয়ে নিশ্চিত কৰিছে ৷ বিধায়কপুৰী থানাৰ এজন বিষয়া অমৰ সিং ৰত্নুৱে উল্লেখ কৰে যে ৭ আগষ্টত হোটেলখনৰ চৌহদৰ ভিতৰতে এই ঘটনা সংঘটিত হৈছিল ৷
আৰক্ষী বিষয়াজনে কয় যে, "হোটেলত উপস্থিত থকাৰ সময়তে কিশোৰী গৰাকীৰ সন্মতি অবিহনে ফটো তোলা হৈছিল ৷ আমি হোটেলখনৰ নিৰাপত্তাৰক্ষীৰ কেমেৰাই ৰেকৰ্ড কৰা ফুটেজসমূহ নিখুঁতভাৱে বিশ্লেষণ কৰি পৰিস্থিতিৰ বিষয়ে ব্যাপকভাৱে বুজিব পাৰিছো ৷ আমি এই দুখজনক পৰিঘটনাৰ আঁৰৰ সত্য উন্মোচন কৰিবলৈ চেষ্টা কৰাৰ সময়তে তদন্ত সক্ৰিয়ভাৱে আগবাঢ়িছে।"
আৰক্ষীৰ বিবৃতি অনুসৰি বিদেশী কিশোৰীগৰাকীয়ে হোটেলখনৰ চুইমিং পুলৰ ওচৰতে গা ধুই ৰ’দত জিৰণি লৈ থকাৰ সময়তে তেওঁৰ অনুমতি অবিহনে এদল ব্যক্তিয়ে তেওঁৰ ফটো তুলিবলৈ আৰম্ভ কৰাৰ অভিযোগ উত্থাপন হৈছে ৷ আৰক্ষীয়ে নিশ্চিত কৰা অনুসৰি কিশোৰী গৰাকীৰ গোপনীয়তাত এই আক্ৰমণৰ বাবে অত্যন্ত অস্বস্তি অনুভৱ কৰি তেওঁ তৎক্ষণাত তেওঁলোকৰ এই কাৰ্যৰ বিৰুদ্ধে সতৰ্কবাণী শুনাইছিল ৷
হোটেলখনৰ কৰ্মচাৰীয়ে দ্ৰুতগতিত এই কাৰ্যত হস্তক্ষেপ কৰি কিশোৰী গৰাকীৰ সুৰক্ষা নিশ্চিত কৰে আৰু ততাতৈয়াকৈ স্থানীয় কৰ্তৃপক্ষক এই বিষয়ে অৱগত কৰে ৷ ইয়াৰ পিছতে আৰক্ষীক লগে লগে হোটেল চৌহদলৈ প্ৰেৰণ কৰা হয় আৰু বিষয়টোৰ তদন্ত আৰম্ভ কৰে ৷ এই গোচৰৰ সন্দৰ্ভত সন্দেহজনক বুলি গণ্য কৰা ব্যক্তিসকলকো আৰক্ষীয়ে জেৰাৰ প্ৰক্ৰিয়া অব্যাহত ৰাখিছে ৷
জয়পুৰত বিদেশী যুৱতী আৰু মহিলাক নিৰ্যাতনৰ বহু ঘটনা চৰ্চালৈ আহিছে। শেহতীয়াকৈ সংগীৰ সৈতে পথেৰে খোজ কাঢ়ি যোৱা এগৰাকী মহিলাক অশালীন ব্যৱহাৰ কৰা ভিডিঅ’ ভাইৰেল হৈ পৰিছে ৷ পৰৱৰ্তী সময়ত আৰক্ষীয়ে বিকানেৰৰ পৰা এই ঘটনাৰ অভিযুক্তক আটক কৰে ৷ ইয়াৰ পূৰ্বে ধূলাণ্ডী উপলক্ষে বিদেশী এগৰাকী বিদেশী যুৱতীক বলপূৰ্বকভাৱে গুলাল প্ৰয়োগ কৰাৰ গোচৰো চৰ্চালৈ আহিছিল ৷ এই ঘটনাৰ অভিযুক্তকো আৰক্ষীয়ে গ্ৰেপ্তাৰ কৰে ৷
