নেশ্যনেল ডেস্ক, ৭ এপ্ৰিল: তামিলনাডু নিৰ্বাচনৰ পূৰ্বে নিৰ্বাচন আয়োগৰ জাননী জাৰি ডিএমকে নেতা উদয়নিধি ষ্টালিনলৈ । প্ৰয়াত বিজেপি নেতা অৰুণ জেটলী আৰু প্ৰয়াত প্ৰাক্তন কেন্দ্ৰীয় মন্ত্ৰী সুষমা স্বৰাজৰ সম্পৰ্কত কৰা মন্তব্যক লৈ ডিএমকে নেতা উদয়নিধি ষ্টালিনক জাননী জাৰি নিৰ্বাচন আয়োগৰ । বুধবাৰে সন্ধিয়া ৫ বজাত ষ্টালিনক নিৰ্বাচনী কাৰ্যালয়ত উপস্থিত হ'বলৈ উক্ত জাননী জাৰি কৰা হৈছে ।
যোৱা ১ এপ্ৰিলত উদয়ানিধি ষ্টালিনে প্ৰয়াত প্ৰাক্তন মন্ত্ৰী দুগৰাকীৰ সম্পৰ্কত এক মন্তব্য কৰিছিল । প্ৰধানমন্ত্ৰী নৰেন্দ্ৰ মোডীৰ অত্যাধিক 'অত্যাচাৰ' আৰু 'চাপ'ৰ বাবেই প্ৰাক্তন কেন্দ্ৰীয় মন্ত্ৰী সুষমা স্বৰাজ আৰু অৰুণ জেটলীৰ মৃত্যু হোৱাৰ অভিযোগ উত্থাপন কৰে ষ্টালিনে । তেওঁৰ এই মন্তব্যৰ পাচতে এক বিতৰ্কৰ সৃষ্টি হয় ।
বিজেপিৰ তামিলনাডু গোটে মুখ্য নিৰ্বাচনী বিষয়াৰ ওচৰত ষ্টালিনৰ বিৰুদ্ধে এই অভিযোগ দাখিল কৰে । ইয়াৰোপৰি, ডিএমকে নেতাগৰাকীয়ে যোৱা ৩১ মাৰ্চত ধাৰাপুৰমৰ এক ৰাজহুৱা সভাত প্ৰধানমন্ত্ৰীয়ে ভেংকায়া নাইডুৰ দৰে বিজেপি জ্যেষ্ঠ নেতাসকলক একাষৰীয়া কৰিছে বুলি মন্তব্য কৰে ।
লগতে পঢ়ক: জে দি(ইউ)ত যোগদান এল জে পিৰ বিধায়ক ৰাজকুমাৰ সিঙৰ
