নেশ্যনেল ডেস্ক, ১ আগষ্ট : ভাৰতৰ নতুন কণ্ট্ৰ'লাৰ জেনেৰেল অফ একাউণ্ট (Controller General of Accounts) হিচাপে দায়িত্ব গ্ৰহণ দীপক দাসৰ । দেওবাৰে বিত্ত মন্ত্ৰালয়ৰ ব্যয় বিভাগৰ চিজিএ হিচাপে দায়িত্ব গ্ৰহণ কৰে বিষয়াগৰাকীয়ে । দীপক দাস হৈছে চিজিএ পদত অধিষ্ঠিত ২৫ তম বিষয়া অৰ্থাৎ তেওঁৰ পূৰ্বে ২৪ গৰাকী বিষয়াই এই পদত নিযুক্তি লাভ কৰিছিল ।
এক চৰকাৰী বিবৃতিত কোৱা হৈছে যে, ১৯৮৬ চনৰ ভাৰতীয় অসামৰিক একাউণ্ট সেৱাৰ (ICAS) বিষয়া দীপক দাসক ভাৰত চৰকাৰে ১ আগষ্টৰ পৰা কাৰ্যকৰী হোৱাকৈ বিত্ত মন্ত্ৰণালয়ৰ ব্যয় বিভাগৰ (Department of Expenditure, Ministry of Finance) একাউণ্ট নিয়ন্ত্ৰক জেনেৰেল (CGA) হিচাপে নিযুক্তি দিছে । ৩৫ বছৰীয়া কৰ্মজীৱনত তেওঁ বিজ্ঞান আৰু প্ৰযুক্তি, পৰিৱেশ আৰু বন বিভাগ, উদ্যোগ আৰু আভ্যন্তৰীণ বাণিজ্যৰ প্ৰচাৰ বিভাগ, বাণিজ্য আৰু বস্ত্ৰ, কৃষি আৰু কৃষক কল্যাণ, পথ পৰিবহন, ঘাইপথ, জাহাজ, গৃহ পৰিক্ৰমা আৰু কেন্দ্ৰীয় পৰোক্ষ কৰ আৰু শুল্ক পৰিষদৰ দৰে মন্ত্ৰণালয়ত গুৰুত্বপূৰ্ণ পদত সেৱা আগবঢ়াইছে । তেওঁ ভাৰতীয় অসামৰিক একাউণ্ট সেৱাৰ প্ৰশিক্ষণ একাডেমী ইনষ্টিটিউট অৱ গভৰ্ণমেণ্ট একাউণ্ট এণ্ড ফাইনেন্স (INGAF)ৰ সঞ্চালকও আছিল ।
দীপক দাসে ভাৰত চৰকাৰৰ কেন্দ্ৰীয় ডেপুটেশ্যনত থকা সময়ত গুৰুত্বপূৰ্ণ দপ্তৰসমূহ পৰিচালনা কৰিছিল, য'ত তেওঁ উপ সচিবৰ লগতে প্ৰতিৰক্ষা মন্ত্ৰণালয়ৰ সঞ্চালক আৰু ভাৰতীয় আভ্যন্তৰীণ জলপথ প্ৰাধিকৰণ, বন্দৰ, জাহাজ আৰু জলপথ মন্ত্ৰালয়ত সদস্য (বিত্ত) হিচাপে কাৰ্যনিৰ্বাহ কৰিছে ।
চিজিএৰ দায়িত্ব গ্ৰহণ কৰাৰ পূৰ্বে দিল্লী বিশ্ববিদ্যালয়ৰ (Delhi University) কিৰোৰী মাল মহাবিদ্যালয়ৰ প্ৰাক্তন ছাত্ৰ দাসে কেন্দ্ৰীয় প্ৰত্যক্ষ কৰ পৰিষদত মুখ্য একাউণ্ট নিয়ন্ত্ৰক হিচাপে কাৰ্যনিৰ্বাহ কৰিছিল । তেওঁৰ সময়ত কেইবাটাও উল্লেখযোগ্য পৰিৱৰ্তন দেখা গৈছিল কেন্দ্ৰীয় প্ৰত্যক্ষ কৰ পৰিষদত । প্ৰত্যক্ষ কৰ সংগ্ৰহ, প্ৰতিবেদন আৰু হিচাপ ৰখা সম্পৰ্কীয় কেইবাটাও গুৰুত্বপূৰ্ণ প্ৰযুক্তি-চালিত পদক্ষেপৰ ক্ষেত্ৰত বিশেষ ভূমিকা আছিল দাসৰ ।
লগতে পঢ়ক :ভাৰতৰ সভাপতিত্বত ৰাষ্ট্ৰসংঘৰ নিৰাপত্তা পৰিষদৰ বৈঠক
