নেশ্যনেল ডেস্ক,১৪ ছেপ্টেম্বৰ : চাইৰাছ মিস্ত্ৰীৰ মৃত্যুৰ লগে লগে দুৰ্ঘটনাত পতিত হোৱা বিলাসী বাহনখনৰ সুৰক্ষাক লৈ বিভিন্ন ধৰণৰ প্ৰতিক্ৰিয়াৰ সৃষ্টি হৈছে । বহুতে বিলাসী বাহন মাৰ্চিডিজৰ সুৰক্ষাক লৈ প্ৰশ্ন তুলিছে । ইয়াৰ মাজতে মাৰ্চিডিজ বেঞ্জ কোম্পানীৰ এটা বিশেষজ্ঞ দল আহি উপস্থিত হৈছে মহাৰাষ্ট্ৰৰ থানেত (Mercedes experts team reach Thane)।
দুৰ্ঘটনাত পতিতি মিস্ত্ৰীৰ বাহনখনৰ অনুসন্ধান আৰু পৰিদৰ্শনৰ বাবে হংকঙৰ পৰা আহিছে বিশেষজ্ঞৰ দলটো । থানেৰ মাৰ্চিডিজ শ্ব'ৰুমত বাহনখন পৰীক্ষা কৰি দলটোৱে মাৰ্চিডিজ বেঞ্জ কোম্পানীক এখন প্ৰতিবেদন দাখিল কৰিব (Mercedes experts from Hong kong)।
উল্লেখ্য যে ৪ ছেপ্টেম্বৰত মুম্বাইৰ সমীপত এক পথ দুৰ্ঘটনাত প্ৰখ্যাত উদ্যোগপতি আৰু টাটা চন্সৰ প্ৰাক্তন অধ্যক্ষ মিস্ত্ৰীৰ মৃত্যু হৈছিল (Cyrus Mistry death)। পালঘৰ আৰক্ষীয়ে জনোৱা মতে, মিস্ত্ৰীয়ে আহমেদাবাদৰ পৰা মুম্বাইলৈ যাত্ৰা কৰি আছিল । তেওঁ গৈ থকা মাৰ্চিডিজ বাহনখনে ডিভাইডাৰত খুন্দা মাৰিছিল । গাড়ীখনত চাৰিজন লোক আছিল (Cyrus Mistry Mercedes car accident)। মিস্ত্ৰীকে ধৰি দুজনৰ ঘটনাস্থলীত মৃত্যু হয়, আনহাতে বাকী দুজনক চিকিৎসালয়লৈ প্ৰেৰণ কৰা হয় ।
ইয়াৰ পাছতে, গাড়ী নিৰ্মাতা কোম্পানীটোৱে বিভিন্ন ধৰণৰ প্ৰশ্নৰ সন্মুখীন হৈছে । দুৰ্ঘটনাটোৰ সময়ত দুৰ্ভাগ্যজনকভাৱে বাহনখনত থকা এয়াৰবেগবোৰ কিয় খোলা নাছিল সেই বিষয়ে আৰক্ষীয়ে গাড়ী নিৰ্মাতা কোম্পানীক প্ৰশ্ন কৰিছে ।
বাহনখনত কোনো যান্ত্ৰিক ত্ৰুটি আছিল নেকি ? গাড়ীখনৰ ব্ৰেক ফ্লুইড কি আছিল ? টায়াৰৰ চাপ কি আছিল ? ইয়াৰ উপৰিও আৰক্ষীয়ে প্ৰশ্ন কৰে যে বাহনবোৰ সঠিক পৰীক্ষাৰ পিছতহে প্ৰকল্পটোৰ পৰা ওলাই আহে । এনে পৰিস্থিতিত, নিৰ্মাতাৰ অনুসন্ধানৰ প্ৰতিবেদন কি হ'ব ? সংঘৰ্ষৰ পিছত ষ্টিয়েৰিং লক হৈছিল নেকি ? কোম্পানীটোক এই ধৰণৰ কেইবাটাও প্ৰশ্ন কৰে আৰক্ষীয়ে ।
ইয়াৰ পাছতে কোম্পানীটোৱে কৈছে যে বিশেষজ্ঞ দলটোৱে য'ত প্ৰয়োজন হয় বিষয়াসকলক স্পষ্টীকৰণ প্ৰদান কৰিব আৰু সহযোগিতা আগবঢ়াব । কোম্পানীটোৱে উল্লেখ কৰা মতে বাহনসমূহত শেহতীয়াকৈ সুৰক্ষাৰ সুবিধা আৰু প্ৰযুক্তিৰ ব্যৱহাৰেৰে দায়িত্বশীল নিৰ্মাতা হিচাপে পথ সুৰক্ষা সজাগতা বৃদ্ধিৰ বাবে চেষ্টা অব্যাহত ৰাখিব ।
