নিউজ ডেস্ক, ২০ মে' : জম্মু-কাশ্মীৰত ভাৰতে জি-২০ বৈঠক আয়োজন কৰাক লৈ তীব্ৰ আশংকা ব্যক্ত কৰিছে চীনে (China opposes G20 meeting in JK) । এই ক্ষেত্ৰত চীনা কৰ্তৃপক্ষই দৃঢ়তাৰে কয় যে তেওঁলোকে বিতৰ্কিত অঞ্চলসমূহত যিকোনো ধৰণৰ জি-২০ বৈঠক অনুষ্ঠিত কৰাৰ বিৰোধিতা কৰিছে আৰু এনে বৈঠকত উপস্থিত নাথাকে (China calls JK disputed territory) । এইখিনিতে উল্লেখ কৰিবলগীয়া যে চীনে সীমান্ত বিবাদৰ বাবে ইতিপূৰ্বে ২৬ মাৰ্চত অৰুণাচল প্ৰদেশৰ ৰাজধানী ইটানগৰত অনুষ্ঠিত গুৰুত্বপূৰ্ণ জি-২০ বৈঠকতো অংশগ্ৰহণ কৰা নাছিল ।
চীনৰ বৈদেশিক মন্ত্ৰালয়ৰ মুখপাত্ৰ ৱাং ৱেনবিনে শুকুৰবাৰে কয়, "চীনে 'বিতৰ্কিত' অঞ্চলত যিকোনো প্ৰকাৰতে জি-২০ বৈঠক অনুষ্ঠিত কৰাৰ দৃঢ় বিৰোধিতা কৰে আৰু এনে বৈঠকত উপস্থিত নাথাকে (China skipped G20 meeting in Jammu Kashmir) ।"
উল্লেখ্য, ২০২০ চনত লাডাখত সংঘটিত সামৰিক সংঘৰ্ষৰ পাচৰে পৰা চীন আৰু ভাৰতৰ মাজত সম্পৰ্ক তিক্ত হৈ আছে । উক্ত সংঘৰ্ষত ২৪ জন সৈনিকে প্ৰাণ হেৰুওৱাৰ পিচত পৰিস্থিতি উত্তেজনাপূৰ্ণ হৈ পৰে । আনহাতে, চীনৰ এই আপত্তিৰ প্ৰতিক্ৰিয়া স্বৰূপে ভাৰতে নিজৰ ভূখণ্ডত বৈঠক অনুষ্ঠিত কৰাৰ অধিকাৰৰ ওপৰত গুৰুত্ব আৰোপ কৰে । লগতে সীমান্তত শান্তি-শৃংখলা বৰ্তাই ৰখাৰ বাবে দ্বিপাক্ষিক সম্পৰ্ক স্বাভাৱিক কৰি ৰখাৰ ওপৰত গুৰুত্ব আৰোপ কৰে ।
এইখিনিতে উল্লেখনীয় যে জি-২০ সদস্যসকলৰ পৰ্যটন-কাৰ্যকৰী গোটৰ প্ৰতি লক্ষ্য ৰাখি জি-২০ পৰ্যটন বৈঠকখন অহা ২২ মে'ৰ পৰা ২৪ মে'লৈ জম্মু-কাশ্মীৰৰ গ্ৰীষ্মকালীন ৰাজধানী শ্ৰীনগৰত অনুষ্ঠিত হ'ব (G20 tourism meeting in Srinagar) । কিন্তু এই ক্ষেত্ৰত চীনৰ বিৰোধিতা সত্বেও ভাৰতে এই কাৰ্যসূচী আগবঢ়াই নিব বিচাৰে । ভাৰত চৰকাৰে ইতিমধ্যে অসংখ্য জি-২০ সদস্য দেশ আৰু অতিথি ৰাষ্ট্ৰক ইয়াত অংশগ্ৰহণৰ বাবে আমন্ত্ৰণ জনাইছে । অৱশ্যে ইয়াৰ মাজতে চীন, তুৰস্ক আৰু চৌডি আৰবকে ধৰি কিছু ৰাষ্ট্ৰই শ্ৰীনগৰত অনুষ্ঠিত হ'বলগীয়া অনুষ্ঠানটোৰ বাবে নিজৰ নাম প্ৰত্যাহাৰ কৰিছে ।
কিন্তু ভাৰত চৰকাৰে এইটো কথাত গুৰুত্ব আৰোপ কৰিছে যে আয়োজক ৰাষ্ট্ৰ হিচাপে জি-20 অনুষ্ঠানৰ বাবে স্থান বাছনি কৰাৰ অধিকাৰ ভাৰতৰ আছে । যিহেতু জম্মু-কাশ্মীৰ ভাৰতৰ অংশ, সেয়েহে এই বৈঠকখন দেশৰ অধিকাৰ ক্ষেত্ৰৰ ভিতৰত অনুষ্ঠিত কৰিছে । ইয়াৰ দ্বাৰা ভাৰতে অঞ্চলটোত কৰা উন্নয়নৰ অগ্ৰগতি প্ৰদৰ্শনৰ লগতে পৰ্যটনস্থলী হিচাবে অঞ্চলটোৰ সম্ভাৱনা বৃদ্ধিৰ লক্ষ্য ৰাখিছে ।
জি-২০ পৰ্যটন বৈঠকৰ মূল অনুষ্ঠানটো ২২ আৰু ২৩ মে'ত শ্বেৰ-ই-কাশ্মীৰ আন্তঃৰাষ্ট্ৰীয় সন্মিলন কেন্দ্ৰত (Sher-i-Kashmir International Conference Centre) অনুষ্ঠিত হ'ব । জি-২০ সদস্য দেশসমূহৰ শতাধিক প্ৰতিনিধি দল আৰু আমন্ত্ৰণিত অতিথি তাত উপস্থিত থাকিব বুলি আশা কৰা হৈছে । আন্তৰ্জাতিক মানদণ্ড পূৰণ কৰাৰ বাবে ইতিমধ্যে সন্মিলন কেন্দ্ৰটো উন্নীত কৰা হৈছে আৰু অংশগ্ৰহণকাৰীসকলৰ বাবে এক পৰিৱেশ-অনুকূল পৰিৱেশ সৃষ্টি কৰাৰ প্ৰচেষ্টা কৰা হৈছে । ভাৰত চৰকাৰে অনুষ্ঠানটোৰ সফলতা নিশ্চিত কৰিবলৈ আৰু জম্মু-কাশ্মীৰৰ সংস্কৃতি, পৰ্যটন আৰু কলা প্ৰদৰ্শন কৰিবলৈ প্ৰতিশ্ৰুতিবদ্ধ হৈছে ।
