নেশ্যনেল ডেস্ক, 4 ফেব্ৰুৱাৰী: বুধবাৰে আগৰতলা আৰক্ষী আৰু চাইল্ড লাইন কৰ্তৃপক্ষই অভিযান চলাই 11 টি শিশু উদ্ধাৰ কৰে ৷ শিশু শ্ৰমিক হিচাপে আনৰ ঘৰত কাম কৰাৰ বাবে লৈ যোৱা অৱস্থাত উদ্ধাৰ কৰে শিশু কেইটিক ৷ চাইল্ড লাইন কৰ্তৃপক্ষই শিশু কেইটিক উদ্ধাৰ কৰি যাৱতীয় আইনী প্ৰক্ৰিয়া সম্পন্ন কৰি নিজ পৰিয়ালৰ হাতত গতাই দিয়ে ৷
ঘটনা অনুসৰি,চন্দ্ৰপুৰ আন্তঃৰাজ্যিক বাছ আস্থানত এজন সন্দেহজনক লোকৰ সৈতে 11 গৰাকী যুৱতীক প্ৰত্যক্ষ কৰিছিল ৷ লগে লগে আৰক্ষীয়ে লোকজনক সোধ-পোছ কৰাত পোহৰলৈ আহে প্ৰকৃত সত্য ৷ আৰক্ষীয়ে সমগ্ৰ ঘটনা পৰ্যবেক্ষণ কৰাৰ পাচত চাইল্ড লাইন কৰ্তৃপক্ষৰ লগত যোগাযোগ কৰি শিশু কেইটিক উদ্ধাৰ কৰে ৷ আৰক্ষীয়ে জনোৱা মতে,লোকজনে শিশুকেইটিৰ পৰিয়ালক ধনৰ লোভ দেখুৱাই আনৰ ঘৰত সহায়ক হিচাপে কাম কৰাৰ বাবে লৈ গৈ আছিল আগৰতলালৈ ৷ কিন্তু আৰক্ষীৰ হাতত ধৰা পৰে লোকজন ৷ আগৰতলা মহিলা আৰক্ষী থানাই শিশু কেইটিক নিজৰ জিম্মাত লৈ লোকজনক আটক কৰিছে ৷
ইফালে,চাইল্ড লাইন কৰ্তৃপক্ষই জনোৱা মতে,উদ্ধাৰ কৰা 11 টি শিশুৰ ভিতৰত 2জনী 18 বছৰীয়া যুৱতীকো উদ্ধাৰ কৰা হৈছে ৷ ইতিমধ্যে যুৱতী কেইগৰাকীৰ পৰিয়ালৰ লোকৰ লগত যোগাযোগ কৰি ঘৰলৈ পঠিওৱাৰ সকলো কাম সম্পন্ন কৰা হৈছে ৷
লগতে পঢ়ক: ম্যানমাৰত গণতন্ত্ৰ পুনৰুদ্ধাৰৰ বাবে ভাৰত চৰকাৰৰ হস্তক্ষেপ দাবী নেচোৰ
