নেশ্যনেল ডেস্ক, 22ফেব্ৰুৱাৰী : দেওবাৰে প্ৰতিৰক্ষা মন্ত্ৰী ৰাজনাথ সিঙে তামিলনাডুৰ ভাৰতীয় জনতা যুৱ মৰ্চাৰ এক সন্মিলনত অংশগ্ৰহণ কৰে ৷ এই সন্মিলনত অংশগ্ৰহণ কৰি প্ৰতিৰক্ষা মন্ত্ৰী গৰাকীয়ে মন্তব্য কৰে যে, তামিলনাডুৰ সৈতে প্ৰধান মন্ত্ৰী নৰেন্দ্ৰ মোডীৰ এক ব্যক্তিগত সম্পৰ্ক আছে ৷ শ্ৰীলংকাৰ তামিল শৰণাৰ্থীসকলে শান্তিৰে, সমতা আৰু স-সন্মানেৰে বসবাস কৰাটো নিশ্চিত কৰিবলৈ কেন্দ্ৰীয় চৰকাৰ প্ৰতিশ্ৰুতিবদ্ধ ৷
এই সন্মিলনত প্ৰতিৰক্ষা মন্ত্ৰী গৰাকীয়ে কয় যে, দেশৰ প্ৰধান মন্ত্ৰী গৰাকীয়ে শ্ৰীলংকাৰ তামিল শৰণাৰ্থী সকলৰ সবলীকৰণৰ বাবে নিৰন্তৰ চেষ্টা কৰি আহিছে ।
২০১৫ চনত প্ৰধানমন্ত্ৰী হোৱাৰ পিছত মোডীয়ে শ্ৰীলংকা ভ্ৰমণ কৰাৰ সময়ত তেওঁ শ্ৰীলংকাৰ জাফনা অঞ্চল পৰিভ্ৰমণ কৰিছিল ৷ শ্ৰীলংকাৰ জাফনা অঞ্চল পৰিভ্ৰমণ কৰা তেওঁ আছিল ভাৰতৰ প্ৰথম প্ৰধান মন্ত্ৰী ৷ শ্ৰীলংকাত গৃহযুদ্ধৰ বাবে 'গৃহহীন' হোৱা প্ৰায় ২৭ হাজাৰ পৰিয়ালক নতুন ঘৰ দিয়াৰ ব্যৱস্থা কৰিছিল ৷
প্ৰধানমন্ত্ৰী মোডীৰ নেতৃত্বৰ ভাৰতীয় জনতা পাৰ্টিৰ চৰকাৰে শ্ৰীলংকাৰ তামিল শৰণাৰ্থী সকলে শান্তি, সমতা আৰু স-সন্মানেৰে জীয়াই থকাটো নিশ্চিত কৰিবলৈ প্ৰতিশ্ৰুতিবদ্ধ হৈ আছে বুলি এই জনসভাত মন্তব্য কৰে ভাৰতৰ প্ৰতিৰক্ষা মন্ত্ৰী গৰাকীয়ে ৷
লগতে পঢ়কঃ ৰাঙলুত ড্ৰাগছ সহ আটক দুই কুখ্যাত ব্যৱসায়ী
