নেশ্যনেল ডেস্ক, 13 আগষ্ট: ৰাজস্থানৰ জয়ছালমেৰ জিলাত ভয়ংকৰ পথ দুৰ্ঘটনা ৷ জয়ছালমেৰ জিলাত সীমান্ত সুৰক্ষা বাহিনীৰ এখন ট্ৰাক বাগৰি পৰে ৷ ফলত এজন জোৱানৰ মৃত্যু হোৱাৰ লগতে 13 জন লোক আহত হয় ৷ দুৰ্ঘটনা সংঘটিত হোৱাৰ পিচত আহত জোৱানসকলক জয়ছালমেৰ জিলা সদৰত অৱস্থিত চৰকাৰী জৱাহিৰ চিকিৎসালয়লৈ প্ৰেৰণ কৰা হয় ৷ আহত জোৱান কেইজন বৰ্তমান চিকিৎসাধীন হৈ আছে ৷ মৃত জোৱানজন এছ কে ডুবে বুলি জানিব পৰা গৈছে ৷
এই তথ্য লাভৰ পিচত জয়ছালমেৰৰ উপ-আৰক্ষী অধীক্ষক প্ৰিয়ংকা কুমাৱত, এছ এইচ অ’ সত্যপ্ৰকাশ বিষ্ণৈকে ধৰি আন আৰক্ষী জোৱানৰ লগতে সীমান্ত সুৰক্ষা বাহিনীৰ লোকে চিকিৎসালয়ত উপস্থিত হৈ আহতসকলৰ স্বাস্থ্যৰ সন্দৰ্ভত বুজ লয় ৷
দুৰ্ঘটনাটোৰ তথ্য প্ৰকাশ কৰি উপ-আৰক্ষী অধীক্ষক প্ৰিয়ংকা কুমাৱতে কয় যে, শনিবাৰে পুৱা 149 নং বেটেলিয়নৰ বিষয়া-জোৱান কঢ়িওৱা এখন ট্ৰাক জয়ছলমেৰ পাৰ হৈ যায় আৰু লাংতলা গাঁৱৰ সমীপত পথত গাঁতৰ সৃষ্টি হোৱাৰ বাবে চালকে বাহনখনৰ ওপৰত নিয়ন্ত্ৰণ হেৰুৱায় ৷ ফলত বাহনখন বাগৰি পৰে ৷
দুৰ্ঘটনা সংঘটিত হোৱাৰ সময়ত ট্ৰাকখনত মুঠ 13 জন বি এছ এফৰ বিষয়া আৰু জোৱানে যাত্ৰা কৰি আছিল ৷ এই তথ্য লাভ কৰাৰ পিছতে শ্বাহগড় আৰক্ষী থানাৰ এটা দলে সেই স্থানত উপস্থিত হৈ দুৰ্ঘটনাৰ কাৰণৰ তদন্ত অব্যাহত ৰাখিছে ৷ ইতিমধ্যে নিহত জোৱানজনৰ পৰিয়ালৰ লোকক অৱগত কৰা হৈছে ৷ এছ কে ডুবেৰ মৃতদেহ ইতিমধ্যে মৰণোত্তৰ পৰীক্ষা কৰা হ’ব বুলি জানিবলৈ দিয়ে সেনাই ৷ পথত থকা সৰু গাঁতৰ বাবে নে অন্য কাৰণত এই ঘটনা হ’ল তাক লৈ তদন্ত অব্যাহত ৰাখিছে তদন্তকাৰী দলে ৷
লগতে পঢ়ক:Dehradun mega land scam: ডেৰাডুনত ভয়ংকৰ ভূমি কেলেংকাৰীৰে জড়িত অসমৰ দুজনক গ্ৰেপ্তাৰ
