নেশ্যনেল ডেস্ক, ২৮ ডিচেম্বৰ : ৰাজস্থানৰ ভাৰত-পাক সীমান্তৱৰ্তী জয়ছলমেৰ জিলাৰ শ্বাহগড় অঞ্চলত সীমান্ত সুৰক্ষা বাহিনীৰ জোৱানে এটা চিকাৰী ঈগল উদ্ধাৰ কৰে । বুধবাৰে সন্ধিয়া জয়ছেলমেৰ বিএছএফৰ দক্ষিণ খণ্ডৰ দাবলাৰ বেটেলিয়নৰ জোৱানসকলে ঈগলটো উদ্ধাৰ কৰে । উদ্ধাৰ হোৱাটো ঈগলটো পোহনীয়া বুলি সন্দেহ কৰা হৈছে । ঈগলটোৰ ঠেঙত এটা আঙুঠিও আছে । অৱশ্যে, এতিয়ালৈকে বিএছএফয়ে কোনো ধৰণৰ ট্ৰেন্স মিটাৰ সদৃশ সামগ্ৰী উদ্ধাৰ কৰা নাই ।
বিএছএফৰ সূত্ৰৰ মতে অনুসন্ধানৰ অন্তত সীমান্ত সুৰক্ষা বাহিনীয়ে ঈগলটো বন বিভাগক হস্তান্তৰ কৰিছে । এতিয়া বন বিভাগৰ দলটোৱে এই ঈগলটোৰ যত্ন ল'ব । লগতে ঈগলৰ ঠেঙত থকা আঙুঠিটোও পৰীক্ষা কৰিব । আন্তৰ্জাতিক সীমান্ত অঞ্চলত ধৰা পৰা এই পাকিস্তানী ঈগলটো সীমান্তৰ সিপাৰৰ পৰা উৰি আহিছে বুলি সন্দেহ কৰা হৈছে । ইফালে, এই ঈগলটো আৰৱ ৰাজপৰিয়ালৰ সদস্যসকলৰ হ'ব পাৰে বুলিও সন্দেহ কৰা হৈছে ।
উল্লেখ্য যে আৰৱীয় ৰাজপৰিয়ালৰ ৰাজকুমাৰসকলে প্ৰতি বছৰে পাকিস্তানলৈ চিকাৰ কৰিবলৈ আহে । তেওঁলোকে ভাৰত-পাক সীমান্তৰ ওচৰত বহুতো চৰাই চিকাৰ কৰে । আৰৱ শ্বেখসকলে তেওঁলোকৰ লগত বহু প্ৰশিক্ষিত চিকাৰী ঈগল লৈ আহে । কেতিয়াবা সেই ঈগলবোৰ ৰাজস্থানৰ সীমান্তৰ ফালে আহে । কোৱা হয় যে পাকিস্তান চৰকাৰে তেওঁলোকক চিকাৰৰ অনুমতি দিয়ে । ইয়াৰ বিনিময়ত, তেওঁলোকে তেওঁলোকৰ পৰা বৃহৎ পৰিমাণৰ মাচুল সংগ্ৰহ কৰে ।
ইফালে চিকাৰী ঈগল উদ্ধাৰক লৈ জয়ছেলমেৰত ব্যাপক চাঞ্চল্যৰো সৃষ্টি হৈছে । এই ঈগলটো চাবলৈ বহুতৰ মাজত কৌতূহলৰো সৃষ্টি হৈছে । অৱশ্যে ঈগলটো ক'ৰ পৰা আহিল আৰু এইটো আৰৱৰ ৰাজপৰিয়ালৰ হয় নে নহয় তাক লৈ বিভাগীয় কৰ্তৃপক্ষই অনুসন্ধান অব্যাহত ৰাখিছে ।
লগতে পঢ়ক :ইজৰাইলী দূতাবাসত বোমাতংক, নিৰাপত্তা বৃদ্ধি
