নিউজ ডেস্ক, ২৬ অক্টোবৰ : বুধবাৰে হায়দৰাবাদৰ এটা টেলিভিছন চেনেলত নিৰ্বাচনী বিতৰ্কৰ পোনপটীয়া সম্প্ৰচাৰ অনুষ্ঠান ৰণক্ষেত্ৰত পৰিণত হয় । এই অনুষ্ঠানত এগৰাকী জনপ্ৰতিনিধিয়ে ভয়ংকৰ ৰূপ ধাৰণ কৰে । বিআৰএছৰ বিধায়ক কে পি বিবেকানন্দই বিজেপি প্ৰাৰ্থী কে শ্ৰীশৈলম গৌড়ক অনুষ্ঠানটো চলি থকাৰ মাজতে আক্ৰমণ কৰে । বৃহত্তৰ হায়দৰাবাদৰ কুথবুল্লাপুৰ সমষ্টিৰ ভাৰত ৰাষ্ট্ৰ সমিতিৰ (বিআৰএছ) বিধায়কজনে নিজৰ ধৈৰ্য হেৰুৱাই পেলায় আৰু গৌড়ক ডিঙিত ধৰে । বিজেপি প্ৰাৰ্থীগৰাকীয়ে কিছু অপমানজনক মন্তব্য কৰাৰ পিছতে তেওঁ এই আক্ৰমণৰ ঘটনা সংঘটিত কৰে ।
গৌড়ে তেওঁক ভূমি বেদখলকাৰী বুলি কোৱাৰ পিছতে বিধায়কজনৰ খং উঠে । ইয়াৰ ফলত তীব্ৰ বিতৰ্কৰ সৃষ্টি হয় । তাৰ পিছত বিজেপি প্ৰাৰ্থীগৰাকীয়ে আৰু কিছু মন্তব্য কৰে । ইয়াৰ পিছতে বিবেকানন্দ তেওঁৰ ফালে দৌৰি যায় আৰু তেওঁক ডিঙিত ধৰি ধৰি ঠেলি দিয়ে । আনহাতে, সেই সময়ত অনুষ্ঠানটোৰ সঞ্চালক আৰু আৰক্ষীয়ে দুয়োগৰাকী নেতাক শান্ত কৰিবলৈ হস্তক্ষেপ কৰে । এই ঘটনাটোৱে সম্পূৰ্ণ বিশৃংখলতাৰ সৃষ্টি কৰে । সেই সময়ত তাত উপস্থিত থকা দুয়োগৰাকী নেতাৰ সমৰ্থকে বেৰিকেড ভাঙে আৰু মঞ্চৰ ফালে দৌৰি যায় আৰু চকী দলিয়াবলৈ আৰম্ভ কৰে ।
আনহাতে, দুয়োটা দলেই ইজনে সিজনক আক্ৰমণ কৰিবলৈ চেষ্টা কৰাৰ বাবে আৰক্ষীয়ে পৰিস্থিতি নিয়ন্ত্ৰণ কৰাটো কঠিন হৈ পৰে । উল্লেখ্য যে এটা তেলুগু দূৰদৰ্শন চেনেলে সমষ্টিটোৰ মুখ্য প্ৰতিদ্বন্দ্বীসকলৰ মাজত বিতৰ্কৰ আয়োজন কৰিছিল । ইতিমধ্যে এই হতাহতিৰ ঘটনাৰ ভিডিঅ'টো সামাজিক মাধ্যমত ভাইৰেল হৈ পৰিছে । ইফালে বিজেপিয়ে দলটোৰ বিধায়কৰ ওপৰত হোৱা আক্ৰমণক গৰিহণা দি কৈছে যে এইটোৱে দেখুৱায় যে বিআৰএছ হতাশ হৈ পৰিছে আৰু তেওঁলোক বিজেপিৰ হাতত পৰাজিত হৈছে ।
কেন্দ্ৰীয় মন্ত্ৰী তথা ৰাজ্যিক বিজেপিৰ সভাপতি জি কিষাণ ৰেড্ডীয়ে বিআৰএছ বিধায়কৰ দ্বাৰা বিজেপি প্ৰাৰ্থীৰ ওপৰত হোৱা আক্ৰমণক গৰিহণা দিছে । তেওঁ অভিযোগ কৰে যে হায়দৰাবাদ আৰু ইয়াৰ আশেপাশে থকা ভূমি বেদখল কৰি কোটি কোটি টকা লুণ্ঠন কৰি থকা বিআৰএছ বিধায়কসকলে ৰাস্তাত গুণ্ডাৰ দৰে আচৰণ কৰি আছে । কিষাণ ৰেড্ডীয়ে কয় যে বিআৰএছৰ বিধায়কজনে শাৰীৰিক আক্ৰমণ কৰিছিল, কিয়নো তেওঁৰ ওচৰত গৌড়ৰ প্ৰশ্নৰ কোনো উত্তৰ নাছিল ।
উল্লেখ্য যে ১১৯ জনীয়া তেলেংগানা বিধানসভাৰ নিৰ্বাচন অহা ৩০ নৱেম্বৰত অনুষ্ঠিত হ'ব ।
লগতে পঢ়ক :Chennai Raj Bhavan : চেন্নাইৰ ৰাজভৱনৰ বাহিৰত পেট্ৰ’ল বোমা নিক্ষেপ, ডি এম কে চৰকাৰক কটাক্ষ বিৰোধীৰ
