প্ৰধানমন্ত্ৰী মোডীৰ বাবেই বিজেপিত যোগদান কৰিছোঃ ববিতা ফোগট

সোমবাৰে ভাৰতীয় জনতা পাৰ্টীত আনুষ্ঠানিকভাৱে যোগদান কৰে মল্লযুঁজাৰু ববিতা ফোগটে ৷ নিজৰ পিতৃ মহাবীৰ ফোগটৰ সৈতে নতুন দিল্লীত অনুষ্ঠিত এক সভাত বিজেপিত যোগদান কৰে বিশিষ্ট খেলুৱৈগৰাকীয়ে ৷

নিউজ ডেস্ক, 12 আগষ্টঃ সোমবাৰে ভাৰতীয় জনতা পাৰ্টীত যোগদান কৰে দেশৰ আগশাৰীৰ খেলুৱৈ ববিতা ফোগটে ৷ দ্ৰোণাচাৰ্য বঁটা প্ৰাপক মল্লযুঁজাৰুগৰাকীয়ে নিজৰ পিতৃ মহাবীৰ ফোগটৰ সৈতে একেলগে বিজেপিত যোগদান কৰে ৷ হাৰিয়ানাৰ বিধানসভা নিৰ্বাচনৰ পূৰ্বেই খেলুৱৈগৰাকীয়ে বিজেপিত যোগদান কৰাক লৈ এতিয়া সৰ্বত্ৰে চৰ্চাৰ সৃষ্টি হৈছে ৷

কেন্দ্ৰীয় ৰাজ্যিক মন্ত্ৰী কিৰেণ ৰিজিজুৰ উপস্থিতিত বিজেপিত যোগদান কৰে খেলুৱৈগৰাকীয়ে ৷ দলটোত যোগদান কৰাৰ পৰৱৰ্তী সময়ত ইটিভি ভাৰতৰ সৈতে হোৱা এক সাৎক্ষাকাৰত প্ৰধানমন্ত্ৰী নৰেন্দ্ৰ মোডীৰ প্ৰসংগ উল্লেখ কৰে খেলুৱৈগৰাকীয়ে ৷ ববিতা ফোগটৰ মতে, প্ৰধানমন্ত্ৰী নৰেন্দ্ৰ মোডী এগৰাকী বিচক্ষণ নেতা ৷ অনুচ্ছেদ 370 আৰু অনুচ্ছেদ 35(A)ৰ ওপৰত মোডীয়ে গ্ৰহণ কৰা সিদ্ধান্ত আদৰণীয় ৷ প্ৰধানমন্ত্ৰী মোডীৰ নেতৃত্বৰ দ্বাৰা অনুপ্ৰাণিত হৈয়ে খেলুৱৈগৰাকীয়ে বিজেপিত যোগদান কৰাৰ কথা উল্লেখ কৰে ৷ অৱশ্যে দলটোত যোগদান কৰিলেও নিজৰ ক্ৰীড়া জীৱন আগৰ দৰেই ৰাখিব বুলি মন্তব্য কৰে খেলুৱৈগৰাকীয়ে ৷