ওড়িশা, সম্বলপুৰ, 13 ডিচেম্বৰঃ একক ব্যৱহৃত প্লাষ্টিকৰ বিৰুদ্ধে সমগ্ৰ বিশ্বই নিষেধজ্ঞা আৰোপ কৰাটো কাৰ্যত প্ৰমাণ কৰিছে উৰিষ্যাৰ সম্বলপুৰৰ মহিলাৰ আত্ম সহায়ক গোটে গ্ৰহণ কৰা পদক্ষেপে ৷ সম্বলপুৰৰ জিলা প্ৰশাসনে জিলা খনৰ ৰেংগালী বনাঞ্চলৰ অন্তৰ্গত গোমেই অঞ্চলত মহিলা আত্ম সহায়ক গোট সমূহক প্লাষ্টিকৰ বিকল্প হিচাপে শাল গছৰ পাতৰ পৰা প্লেট প্ৰস্তুত কৰিবলৈ সহযোগিতা আগবাঢ়িছে ৷ বৰ্তমান জিলা প্ৰশাসনে এই ক্ষেত্ৰত আত্ম সহায়ক গোট সমূহক পৰম্পৰাগত পদ্ধিতৰ পৰিৱৰ্তে প্ৰয়োজনীয় প্ৰশিক্ষণ আৰু যন্ত্ৰ প্ৰদান কৰিছে ৷
প্ৰশাসনৰ এই পদক্ষেপ কেৱল প্লাষ্টিকৰ ব্যৱহাৰৰ বিৰুদ্ধে সজাগতা সৃষ্টি কৰাতে সীমাবদ্ধ নহয়,বৰঞ্চ মহিলা সবলীকৰণ আৰু আত্মনিৰ্ভৰশীল কৰাৰ লগতো জড়িত এই পদক্ষেপ ৷
ৰেংগালী বনাঞ্চলৰ পৰা মহিলা সকলে বিনামূলীয়াকৈ শাল গছৰ পাত সংগ্ৰহ কৰে ৷ পুৱাই মহিলা সকলে বনাঞ্চললৈ গৈ শাল গছৰ পাত সংগ্ৰহ কৰে ৷ তাৰ পাছতেই এই পাত সমূহ বন বিভাগৰ কাৰ্যালয়ত থকা প্ৰশিক্ষণ শিবিৰলৈ লৈ যোৱা হয় ৷ পূৰ্বে এগৰাকী মহিলাই এদিনত 100 খন প্লেটহে নিৰ্মাণ কৰিব পাৰিছিল ৷ কিন্তু প্ৰশাসনে যোগান ধৰা যন্ত্ৰৰ ব্যৱহাৰৰ ফলত প্ৰত্যেক দিনে এগৰাকী মহিলাই 500 খনকৈ প্লেট নিৰ্মাণ কৰিবলৈ সক্ষম হৈছে ৷ একেদৰে পূৰ্বে প্ৰত্যেক খন প্লেটৰ মূল্য 70 পইচা ধাৰ্য কৰা হৈছিল যদিও বৰ্তমান 3.50 টকা ধাৰ্য কৰা হৈছে ৷
সম্বলপুৰ বন বিভাগৰ অধীনত উৰিষ্যা বন উন্নয়নমূলক প্ৰকল্পৰ নামেৰে গ্ৰহণ কৰা এই পদক্ষেপৰ লগত সম্বলপুৰ জিলা প্ৰশাসন , বন বিভাগ,উৰিষ্যা গ্ৰামোন্নয়ন বিভাগ,উৰিষ্যা জীৱন নিৰ্বাহ অভিযানক সংযুক্ত কৰাৰ বাবে চেষ্টা চলাই থকা হৈছে ৷ বৰ্তমান বন বিভাগে 10 টা চিলাই মেচিন আৰু অন্যান্য উৎপাদনী সামগ্ৰী যোগান ধৰিছে ৷ লগতে অঞ্চলটোত স্থায়ী প্ৰশিক্ষণ শিবিৰ স্থাপন কৰিবৰ বাবে ইতিমধ্যে প্ৰশাসনে স্বাক্ষৰিত কৰিছে চুক্তি ৷
জিলা গ্ৰামোন্নয়ন বিভাগৰ প্ৰকল্প সঞ্চালক সুকান্ত ত্ৰিপাঠীয়ে জানিবলৈ দিয়ে যে,এই চুক্তিৰ জৰিয়তে আত্ম সহায়ক গোট সমূহক বিনামূলীয়াকৈ অধিক যন্ত্ৰ যোগান ধৰি স্থাপন কৰা হ'ব স্থানীয় উদ্যোগ ৷ লগতে তেওঁ কয় যে, এই পাত সমূহ গোৱালৈ প্ৰেৰণ কৰা হ'ব ৷ তাৰ পাছতেই ৰায়পুৰ,ভূপাল আৰু কলকাতালৈ বিতৰণ কৰা হ'ব পাত সমূহ যাৰ জৰিয়তে স্থানীয় বজাৰত উপলব্ধ হ'ব ৷
লগতে পঢ়ক , প্লাষ্টিক বৰ্জনঃ উল্লেখনীয় পদক্ষেপেৰে ৰাজস্থানৰ এখন গাঁও
