নেশ্বনেল ডেস্ক, 19 নৱেম্বৰঃ পাকিস্তানৰ পঞ্জাৱ আৰক্ষীয়ে বিগত 14 নৱেম্বৰত আটক কৰে দুগৰাকী ভাৰতীয় নাগৰিকক ৷ ইটিভি ভাৰতে লাভ কৰা তথ্য অনুসৰি, পাকিস্তানৰ পঞ্জাৱ প্ৰদেশৰ বাহাৱালপুৰৰ পৰা আৰক্ষীয়ে আটক কৰে দুয়োগৰাকী ভাৰতীয় নাগৰিকক ৷ দুয়োগৰাকী নাগৰিক হায়দৰাবাদৰ প্ৰশান্ত বৈদ্যম আৰু মধ্যপ্ৰদেশৰ ৱাৰি লাল বুলি জানিব পৰা গৈছে ৷
কোনো বৈধ নথি-পত্ৰ অবিহনে পাকিস্তানত প্ৰৱেশ কৰিবলৈ লোৱা অৱস্থাতে দুয়োগৰাকী ভাৰতীয়ক আটক কৰে দেশখনৰ আৰক্ষীয়ে ৷ পাকিস্তান আইন 1952ৰ ধাৰা 334-4 ৰ অধীনত ইতিমধ্যে দুয়োগৰাকীকে বিদেশী বুলি ঘোষণা কৰি আটক কৰিছে আৰক্ষীয়ে ৷ ঘটনা সন্দৰ্ভত দুয়োখন দেশৰ বৈদেশিক মন্ত্ৰালয়ৰ তৰফৰ পৰা কোনোধৰণৰ তথ্য এতিয়ালৈকে প্ৰকাশ কৰা হোৱা নাই ৷
উল্লেখ্য যে, চলিত বৰ্ষৰ আগষ্ট মাহত পাকিস্তানৰ পঞ্জাৱৰ পৰা স্থানীয় আৰক্ষীয়ে এগৰাকী ভাৰতীয় চোৰাংচোৱা আটক কৰা বুলি দাবী কৰিছিল ৷ পঞ্জাৱৰ ডেৰা ঘাজী খান চহৰৰ পৰা আটক হোৱা ভাৰতীয় চোৰাংচোৱা, ৰাজু লক্ষ্মনক বালোচিস্তানত প্ৰৱেশৰ সময়তে গ্ৰেপ্তাৰ কৰিছিল পাকিস্তানৰ আৰক্ষীয়ে ৷
