শ্ৰীনগৰ(জম্মু আৰু কাশ্মীৰ) 20 অক্টোবৰঃ শ্ৰীনগৰৰ পুৰণি ধৰ্মীয় স্থান সমূহৰ ঐতিহ্য সংৰক্ষণ আৰু সুৰক্ষাৰ বাবে চৰকাৰে নগৰখনত কেবাটাও উন্নয়নমূলক প্ৰকল্প গ্ৰহণ কৰিছে৷
শ্ৰীনগৰ চহৰৰ ফতেহ কদল অঞ্চলত ঝিলাম নৈৰ তীৰত অৱস্থিত শতিকা প্ৰাচীন ৰঘূনাথ মন্দিৰটোক আগৰ দৰে সজাই তোলাৰ বাবে বিশেষ প্ৰচেষ্টা গ্ৰহণ কৰা হৈছে৷ ভগৱান ৰামৰ উদ্দেশ্যে উৎসৰ্গিত মন্দিৰটো কাশ্মীৰ উপত্যকাৰ ভিতৰত অন্যতম উপাসনাস্থলী হিচাপে পৰিচিত হৈ আহিছে ৷ মন্দিৰটো পুনৰুদ্ধাৰৰ বাবে যি আচনি গ্ৰহণ কৰা হৈছে সেয়া স্মাৰ্ট চিটিৰ অধিনত গ্ৰহণ কৰা হৈছে ৷ ৰাজ্যখনৰ পৰ্যটন বিভাগৰ তত্বাৱধানত পুনৰ নিৰ্মাণৰ কাম চলি আছে মন্দিৰটোৰ ৷
নব্বৈৰ দশকৰ পূৰ্বে এক ঘটনাত ঐতিহাসিক ৰঘূনাথ মন্দিৰৰ ক্ষতিগ্ৰস্ত হৈছিল ৷ এই ঐতিহাসিক মন্দিৰটো বিগত তিনিটা দশক ধৰি জৰাজীৰ্ণ অৱস্থাত পৰি ৰৈছিল ৷ আনুমানিক 54 লাখ টকা ব্যয়েৰে মন্দিৰটো পুনৰ নিৰ্মাণ তথা সংস্কাৰৰ বাবে পৰিকল্পনা গ্ৰহণ কৰিছে আৰু এই কাম এই বছৰৰ শেষৰ ফালে অৰ্থাৎ ডিচেম্বৰ মাহৰ ভিতৰত সম্পূৰ্ণ হোৱাৰ আশা কৰা হৈছে ৷ সংস্কাৰৰ পিচতেই ঐতিহাসিক মন্দিৰটো ভক্তসকলৰ বাবে মুকলি কৰি দিয়া হ'ব ৷
1935 চনত ৰঘূনাথ মন্দিৰটো মহাৰাজা গুলব সিংহই নিৰ্মাণকাৰ্য আৰম্ভ কৰিছিল আৰু তেখেতৰ পুত্ৰ তথা উত্তৰসূৰী মহাৰাজা ৰণবীৰ সিংহই 1860 চনত এই মন্দিৰৰ নিৰ্মাণ কাৰ্যৰ কাম সম্পূৰ্ণ কৰিছিল ৷ মন্দিৰৰ বাহিৰেও স্মাৰ্ট চিটি প্ৰকল্পৰ অধিনত এটা গীৰ্জা, এই এম টিত এটা গুৰুদ্বাৰা আৰু শ্ৰীনগৰৰ হাছানবাদত এটা ইমামবাদা পুনৰ নিৰ্মাণৰ কাম হাতত লৈছে ৷
লগতে চাওকঃ তেলেংগানা-অন্ধ্ৰ প্ৰদেশত প্ৰবল বৃষ্টিপাত হোৱাৰ অনুমান বতৰ বিজ্ঞান কেন্দ্ৰৰ
