নিউজ ডেস্ক, ১৪ জুনঃ লক ডাউনৰ সময়ত প্ৰৱাসী শ্ৰমিকক সহায় কৰি মহানুভৱতা দেখুওৱা বলিউড অভিনেতা চনু ছুদৰ পুনৰ প্ৰশংসনীয় পদক্ষেপ । এইবাৰ অভিনেতা গৰাকীয়ে সহায়ৰ হাত আগবঢ়ালে বলিউড অভিনেতা সুৰেন্দ্ৰ ৰাজনক ।
কিছু বিশেষ কামৰ বাবে মুম্বাইত গৈ লক ডাউনৰ বাবে আৱদ্ধ হৈ পৰা অভিনেতা সুৰেন্দ্ৰ ৰাজনক ১৮ জুনৰ ভিতৰত গৃহচহৰ ছতনালৈ ঘূৰাই পঠাব বুলি শনিবাৰে প্ৰতিশ্ৰুতি দিয়ে চনু ছুদে ।
আনহাতে, বলিউড অভিনেতা চনু ছুদৰ প্ৰসংশা কৰি সুৰেন্দ্ৰ ৰাজনে কয় যে, "চনু ছুদে যি কৰি আহিছে সেয়া সঁচাকৈ অসাধাৰণ । এজন ব্যক্তিয়ে অকলে কেনেকৈ ইমান কৰি আহিছে তাক লৈ মই আচৰিত । এনে কাম তেতিয়ালৈকে কৰিব নোৱাৰি যেতিয়ালৈকে মানুহক সহায় কৰিবলৈ প্ৰৱল ইচ্ছা নাথাকে । তেওঁ অসাধৰণ কাম কৰি আহিছে আৰু জনতাই সেই কাম পছন্দ কৰিছে । এক কথাত চনু ছুদ সঁচাকৈ মহান ব্যক্তি ।"
