বুলণ্ডচহৰ,20 ডিচেম্বৰঃ উত্তৰ প্ৰদেশত শুকুৰবাৰৰ দিনটোত নাগৰিকত্ব সংশোধনী আইনৰ প্ৰতিবাদী কাৰ্যসূচীত নিহত লোকৰ সংখ্যা 5 জন বুলি চৰকাৰী সূত্ৰত প্ৰকাশ ৷
সম্প্ৰতি সমগ্ৰ দেশ উত্তাল হৈ পৰিছে নাগৰিকত্ব সংশোধনী আইনক লৈ ৷ দেশৰ সৰ্বত্ৰে এই আইন বিৰোধী প্ৰতিবাদ অব্যাহত আছে ৷ উত্তৰ প্ৰদেশৰ ভিন ভিন এলেকাত প্ৰতিবাদৰ সুযোগ লৈ একাংশই হিংসাত্মক কাৰ্যত লিপ্ত হোৱাৰ ঘটনাও পোহৰলৈ আহিছে ৷ ৰাজ্যখনৰ বুলণ্ডচহৰত এই প্ৰতিবাদৰ ফলত উদ্ভৱ হোৱা পৰিস্থিতিয়ে ইতিমধ্যে ভয়ংকৰ ৰূপ ধাৰণ কৰিছে ৷
শুকুৰবাৰে চহৰখনৰ স্থানীয় আৰক্ষী চকীৰ সন্মুখত নাগৰিকত্ব সংশোধনী আইনৰ প্ৰতিবাদত গুলিয়াগুলিৰ ঘটনা সংঘটিত হয় ৷ পৰিস্থিতি শোচনীয় হোৱাৰ প্ৰতি লক্ষ্য ৰাখি আৰক্ষীয়ে চহৰখনত 144 ধাৰা জাৰি কৰে ৷ উল্লেখ্য যে, অসমৰ সমানে সমানে উত্তৰ প্ৰদেশতো কা বিৰোধী প্ৰতিবাদে চূড়ান্ত ৰূপ ধাৰণ কৰিছে ৷ গোৰখপুৰতো সমান্তৰালকৈ দেখা গৈছে কা বিৰোধী আন্দোলন ৷ শেহতীয়াকৈ সুৰক্ষাৰ স্বাৰ্থত চহৰখনত বৃহৎসংখ্যক আৰক্ষী বাহিনী মোতায়েন কৰা হৈছে ৷ইফালে হঠৰছ এলেকাতো বিয়পিছে সংশোধিত নাগৰিকত্ব আইন বিৰোধী জুই ৷ অঞ্চলটোত প্ৰতিবাদী মিছিলক বাধা প্ৰদান কৰাৰ বাবে আৰক্ষী আৰু প্ৰতিবাদকাৰীসকলৰ মাজত বিতৰ্ক সৃষ্টি হোৱা পৰিলক্ষিত হয় ৷
কাণপুৰঃ উত্তৰ প্ৰদেশৰ হিংসাত্মক ঘটনাৰ প্ৰতি লক্ষ্য ৰাখি কাণপুৰত বৃহস্পতিবাৰে হাই এলাৰ্ট জাৰি কৰা হৈছিল ৷ কিন্তু ইয়াক উপেক্ষা কৰি অধিকাংশ জনতাই কা বিৰোধী প্ৰতিবাদ সাব্যস্ত কৰে ৷ প্ৰতিবাদী জনতাক ৰাজপথত অৱস্থান কৰা দেখা যায় ৷ 144 ধাৰা জাৰি কৰাৰ পিছতো চহৰখনত শুকুৰবাৰে দিনৰ ভাগত নামাজৰ পিছত এক প্ৰতিবাদী সমদল বাহিৰ হয় ৷ এই প্ৰতিবাদৰ সুযোগ লৈ একাংশই আৰক্ষীৰ ওপৰত শিলাবৰ্ষণ কৰে ৷ প্ৰত্যুত্তৰত আৰক্ষীয়ে প্ৰতিবাদকাৰীৰ ওপৰত কন্দুৱা গেছ নিক্ষেপ কৰে ৷
চহৰখনৰ দক্ষিণ প্ৰান্তৰ বাবুপুৰব্বা এলেকাত বিক্ষোভ প্ৰদৰ্শনকাৰীসকলে চাৰিখন বাহনত অগ্নিসংযোগ কৰে ৷ আৰক্ষীয়ে প্ৰতিবাদকাৰী দলটোক উদ্দেশ্যি গুলিচালনা কৰাত 8 জন লোক আহত হয় ৷ আহতসকলক স্থানীয় মেডিকেল কলেজ হাস্পতালত ভৰ্তি কৰোৱা হৈছে ৷ এচ এচ পি অনন্ত দেৱ তিৱাৰীয়ে কয় যে, আৰক্ষীয়ে ঘটনা সম্পৰ্কত ইতিমধ্যে 25 জন লোকক আটক কৰিছে ৷
লগতে চাওকঃদেশৰ আন ৰাজ্যৰ বাবে আদৰ্শ স্বৰূপ অম্বিকাপুৰ পৌৰ নিগম
